ആലപ്പുഴ: നിയമസഭാ തെരഞ്ഞെടുപ്പിലേറ്റ വലിയ പരാജയത്തിന്റെ പശ്ചാത്തലത്തില് സിപിഎമ്മില് ആഭ്യന്തര കലഹം.നേതൃമാറ്റത്തിനായുള്ള ആവശ്യങ്ങളും ശക്തമായി.പിണറായി വിജയനെ പ്രതിപക്ഷ നേതൃസ്ഥാനത്ത് നിന്ന് മാറ്റണമെന്ന് സിപിഎം ആലപ്പുഴ ജില്ലാ സെക്രട്ടറിയേറ്റ് യോഗത്തില് ഒരംഗം ആവശ്യമുന്നയിച്ചു. മുന് മുഖ്യമന്ത്രി കൂടിയായ പിണറായി വിജയന് പാര്ട്ടിയില് എന്തിനാണ് ഇത്രയധികം ഇളവുകള് നല്കുന്നതെന്ന ചോദ്യവും ഉണ്ടായി.
മുഖ്യമന്ത്രിയായപ്പോഴും ഇപ്പോള് പ്രതിപക്ഷ നേതാവാക്കിയപ്പോഴും പിണറായി വിജയന് പാര്ട്ടി മാനദണ്ഡങ്ങളില് ഇളവുകള് നല്കിയെന്നാണ് പ്രധാന വിമര്ശനം. മുതിര്ന്ന നേതാക്കളായ തോമസ് ഐസക്, സജി ചെറിയാന് എന്നിവര് പങ്കെടുത്ത യോഗത്തിലാണ് വിമര്ശനം ഉയര്ന്നത്.
എം.വി. ഗോവിന്ദന്റെ ഭാര്യ പി.കെ. ശ്യാമളയെ സ്ഥാനാര്ത്ഥിയാക്കിയത് തെരഞ്ഞെടുപ്പില് വലിയ തിരിച്ചടിയായെന്ന് ജില്ലാ സെക്രട്ടറിയേറ്റ് വിലയിരുത്തി. പാര്ട്ടിക്കുള്ളില് നിന്നും പൊതുസമൂഹത്തില് നിന്നും വിമര്ശനങ്ങള് ഉയര്ന്നിട്ടും എം.വി. ഗോവിന്ദന് പ്രവര്ത്തന ശൈലി മാറ്റാന് തയാറാകുന്നില്ലെന്നും അംഗങ്ങള് കുറ്റപ്പെടുത്തി.
