കൊച്ചി : ശബരിമല സ്വര്ണക്കൊള്ള കേസില് അന്വേഷണം പൂര്ത്തിയാക്കാന് പ്രത്യേക അന്വേഷണ സംഘത്തിന് രണ്ടാഴ്ച കൂടി സാവകാശം നല്കി ഹൈക്കോടതി ദേവസ്വം ബെഞ്ചിന്റെ ഇടക്കാല ഉത്തരവ്. ജംഷഡ്പൂര് ലാബില് നിന്നുള്ള സാമ്പിളിന്റെ വിദഗ്ധ പരിശോധനാ ഫലം 10 ദിവസത്തിനുളളില് ലഭിക്കും.ഫലം ലഭിച്ച ശേഷം സ്വര്ണക്കൊള്ളയുടെ സ്വഭാവം മനസിലാക്കാനാകുമെന്ന് പ്രത്യേക അന്വേഷണ സംഘം കോടതിയെ അറിയിച്ചു.
ലാബിലെ ഫലം ലഭിക്കുന്നത് താമസിച്ചാലും അത് പ്രശ്നമാക്കേണ്ടതില്ലെന്ന് കോടതി നേരത്തെ വ്യക്തമാക്കിയിരുന്നു. സാമ്പിളുകളുടെ ഫലം ലഭിച്ചാല് മാത്രമേ എത്ര സ്വര്ണമാണ് നഷ്ട്ടപ്പെട്ടിരിക്കുന്നതെന്ന് മനസിലാക്കാന് സാധിക്കൂ. അതിന്ശേഷമാകും കുറ്റപത്രം അടക്കം നല്കുക.
2025 ല് സ്വര്ണം പൂശാനായി പാളികള് ചെന്നൈയിലേക്ക് കൊണ്ടുപോയതിലും കേസ് എടുക്കണമോ എന്ന കാര്യത്തില് തീരുമാനം എടുക്കുന്നതും പരിശോധനാഫലം ലഭിച്ചശേഷമായിരിക്കും. ഇതുവരെ 391 സാക്ഷികളെയാണ് കേസില് വിസ്തരിച്ചത്.
