തിരുവനന്തപുരം: സംസ്ഥാനത്തെ പൊതുജന ആരോഗ്യ സംവിധാനം പൊളിച്ച് എഴുതണമെന്ന് കേരള ഗവണ്മെന്റ് മെഡിക്കല് കോളജ് ടീച്ചേഴ്സ് അസോസിയേഷന് (കെജിഎംസിടിഎ). മെഡിക്കല് കോളജുകളിലെ ക്ലിനിക്കല് സംവിധാനങ്ങള്, രോഗികളുടെ എണ്ണം, ഉപകരണങ്ങളുടെ ലഭ്യതയും അവയുടെ പരിപാലനവും, അക്കാദമിക് ഗവേഷണ സൗകര്യങ്ങള്, ജീവനക്കാരുടെ കുറവ് ഉള്പ്പെടെ വ്യക്തമാക്കി ധവളപത്രം പുറത്തിറക്കണം. മെഡിക്കല് കോളജുകളിലെ നിലവിലെ അവസ്ഥ പഠിക്കാന് സമിതിയെ നിയോഗിക്കണമെന്നും കെജിഎംസിടിഎ സംയുക്ത കേന്ദ്ര നിര്വാഹക സമിതിയോഗം നിയുക്ത സര്ക്കാരിനോട് ആവശ്യപ്പെട്ടു.
കെജിഎംസിടിഎയുടെ നിയമപോരാട്ടത്തെയും സമരത്തെയും തുടര്ന്ന് നാല് വര്ഷവും ഒമ്പത് മാസവുമുള്ള കുടിശ്ശിക നല്കാന് കോടതിയും സര്ക്കാരിന് നിര്ദേശം നല്കിയിരുന്നു. എന്നാല് പെരുമാറ്റച്ചട്ടം നിലവില് വന്നതിനാല് ഉത്തരവ് പുറത്തിറക്കാന് കഴിഞ്ഞിരുന്നില്ല. അധികാരത്തില് വരുന്ന ഈ സര്ക്കാര് എത്രയും വേഗം ഈ ഉത്തരവ് ഇറക്കണം. മെഡിക്കല് കോളേജ് സേവനത്തിലേക്കു പുതിയ അസിസ്റ്റന്റ് പ്രൊഫസര്മാരുടെ കുറവ് പരിഹരിക്കാന് പുതിയ പാക്കേജുകള് രൂപീകരിക്കണം. ആരോഗ്യമേഖലയിലേക്കുള്ള ബജറ്റ് വിഹിതം വര്ധിപ്പിക്കണം. സ്ഥലംമാറ്റ മാനദണ്ഡങ്ങളും മറ്റ് അനുബന്ധ സര്വീസ് പ്രശ്നങ്ങളും അടിയന്തരമായി പരിഹരിക്കണം. നിലവിലുള്ള പ്രോജക്റ്റുകളെ ബാധിക്കുന്ന പ്രശ്നങ്ങള് പരിഹരിക്കുക, പുതുതായി ആരംഭിച്ച ഗവണ്മെന്റ് മെഡിക്കല് കോളജുകളിലെ സൗകര്യങ്ങള് മെച്ചപ്പെടുത്തുക, ഉപകരണങ്ങള് വാങ്ങുന്നതിലെ കാലതാമസം ഒഴിവാക്കുക, സുരക്ഷിതമായ തൊഴില് സാഹചര്യവും മികച്ച രോഗീ പരിചരണവും സൗകര്യങ്ങളുടെ അപര്യാപ്തത മൂലം ഉണ്ടാവുന്ന ചികിത്സാ പിഴവുകള് ഇല്ലാതാക്കുവാനും വേണ്ട തരത്തിലുള്ള സംവിധാനങ്ങള് നടപ്പിലാക്കുക തുടങ്ങിയ ആവശ്യങ്ങളും ഉന്നയിച്ചിട്ടുണ്ട്.
പുതിയ സംസ്ഥാന ഭാരവാഹികളായി ഡോ. പി. എസ്. ഷാജഹാന്, കൊല്ലം മെഡിക്കല്കോളജ്(പ്രസിഡന്റ്), ഡോ. സജിത് വിളമ്പില്, തൃശൂര് ഗവര്മെന്റ് മെഡിക്കല് കോളജ്(ജനറല് സെക്രട്ടറി), ഡോ. ഷെഫ്ന(ട്രഷറര്), ഡോ. ഗോപകുമാര് ടി.(ബുള്ളറ്റിന് എഡിറ്റര്), ഡോ. എ അര്ജുന്( ഐടി സെക്രട്ടറി), ഡോ. അരവിന്ദ്.സി.എസ്(ശമ്പളപരിഷ്കരണ സമിതി കണ്വീനര്), ഡോ. ശ്രീകാന്ത്.എസ്(മുഖ്യ ഉപദേഷ്ടാവ്) എന്നിവരെയും യോഗം തെരഞ്ഞെടുത്തു.
