തിരുവനന്തപുരം: വിരമിക്കുന്നതിന് മാസങ്ങള്ക്ക് മുന്നേ ചീഫ് സെക്രട്ടറി എ. ജയതിലകിന് പെന്ഷന് ആനുകൂല്യങ്ങള് അനുവദിച്ച് ഉത്തരവ്. അസാധാരണ ഉത്തരവിറക്കിയത് സസ്പെന്ഷനിലുള്ള എന്. പ്രശാന്ത് ഉള്പ്പെടെയുള്ളവരുടെ ആരോപണങ്ങളില് പുതിയ സര്ക്കാരിന്റെ നടപടി ഭയന്ന്.
സാധാരണ ഗതിയില് ഉദ്യോഗസ്ഥന് വിരമിക്കുന്ന ആഴ്ചയിലാണ് പെന്ഷന് ആനുകൂല്യങ്ങള് അനുവദിച്ച് ഉത്തരവിറക്കുന്നത്. ഡോ. എ. ജയതിലകിന് ജൂണ് മാസം 30 വരെയാണ് സര്വ്വീസുള്ളത്. എന്നാല് രണ്ട് മാസം മുന്നേ ഏപ്രില് 28 ന് പെന്ഷന് ആനുകൂല്യങ്ങള് അനുവദിച്ച് ഉത്തരവിറക്കി. അതായത് മുഖ്യമന്ത്രി രാജിക്കത്ത് നല്കുന്നതിന് മുന്നേ തന്നെ ജയതിലകിനായി ധനവകുപ്പ് ഉത്തരവിറക്കുകയായിരുന്നു. ജയതിലകിനെതിരെ വകുപ്പ്തല അച്ചടക്ക നടപടികളില്ലെന്നും വിജിലന്സ് അന്വേഷണങ്ങളോ കേസുകളോ ഇല്ലെന്നും ജൂലൈ ഒന്നു മുതല് പെന്ഷന് അനുവദിക്കാമെന്നും വ്യക്തമാക്കിയാണ് ഉത്തരവിറക്കിയിരിക്കുന്നത്.
പെന്ഷന് 1,12,500, ഡിസിആര്ജി (ഡത്ത് കം റിട്ടയര്മെന്റ് ഗ്രാറ്റുവിറ്റി) 25 ലക്ഷം, ഫാമിലി പെന്ഷന് 1,12,500, കമ്മ്യൂട്ടെട് പെന്ഷന് 44,24,760 എന്നിങ്ങനെ 70,49,760 രൂപയാണ് പെന്ഷന് ഇനത്തില് അനുവദിച്ചിട്ടുള്ളത്. സസ്പെന്ഡ് ചെയ്യപ്പെട്ട എന്. പ്രശാന്ത് ഉള്പ്പെടെയുളള ഉദ്യോഗസ്ഥര് ജയതിലകിനെതിരെ ഉന്നയിച്ചിട്ടുള്ളത് സാമ്പത്തിക ക്രമക്കേടുകളടക്കം ഗുരുതര ആരോപണങ്ങളാണ്. ഈ ആരോപണങ്ങളിന്മേല് പുതിയ സര്ക്കാര് അന്വേഷണം പ്രഖ്യാപിച്ചാല് ജയതിലകിന് പെന്ഷന് ആനുകൂല്യങ്ങള് തടസപ്പെടും. ഇത് ഒഴിവാക്കാനാണ് യുഡിഎഫ് സര്ക്കാര് വരുന്നതിന് മുന്നേ ധനവകുപ്പ് ഉത്തരവിറക്കിയതെന്നാണ് വിവരം. ജയതിലകിനൊപ്പം അഡീഷണല് ചീഫ് സെക്രട്ടറി രാജന് ഖോബ്രഗഡയുടെ പെന്ഷന് ആനുകൂല്യങ്ങള് അനുവദിച്ചുളള ഉത്തരവും ഇതേദിവസം തന്നെ ഇറക്കിയിട്ടുണ്ട്.
