തിരുവനന്തപുരം: തിങ്കളാഴ്ച നടക്കുന്ന യുഡിഎഫ് സര്ക്കാരിന്റെ സത്യപ്രതിജ്ഞാ ചടങ്ങില് പങ്കെടുക്കാന് തമിഴ്നാട് മുഖ്യമന്ത്രി ജോസഫ് വിജയ് എത്തും.തിങ്കളാഴ്ച രാവിലെ 9 മണിക്ക് വിജയ് തിരുവനന്തപുരത്തെത്തും എന്നാണ് വിവരം. 11 മണിക്ക് മടങ്ങും. കര്ണാടക മുഖ്യമന്ത്രി സിദ്ധരാമയ്യ, ഉപ മുഖ്യമന്ത്രി ഡി കെ ശിവകുമാര്, തെലുങ്കാന മുഖ്യമന്ത്രി രേവന്ത് റെഢ്ഢി, ഹിമാചല് പ്രദേശ് മുഖ്യമന്ത്രി സുഖ് വീന്ദര് സിംഗ് സുഖു, രാഹുല്ഗാന്ധി, പ്രിയങ്ക ഗാന്ധി എന്നിവരും സത്യപ്രതിജ്ഞ ചടങ്ങില് പങ്കെടുക്കും.
സത്യപ്രതിജ്ഞ ചടങ്ങിന് കനത്ത സുരക്ഷയാണ് ഒരുക്കിയിട്ടുളളത്. പാസുമായി വരുന്നവര്ക്ക് മാത്രമേ പ്രവേശനമനുവദിക്കൂ.നഗരത്തില് തിങ്കളാഴ്ച ഗതാഗത ക്രമീകരണവും ഏര്പ്പെടുത്തി.സത്യപ്രതിജ്ഞാ ചടങ്ങിനായി സെന്ട്രല് സ്റ്റേഡിയത്തില് ഒരുക്കങ്ങള് തകൃതി.പതിനായിരത്തോളം പേര്ക്ക് ഇരിക്കാനാകുന്ന തരത്തിലാണ് പന്തലിടുന്നത്. ഒരു ലക്ഷത്തോളം പേര് സത്യപ്രതിജ്ഞയ്ക്ക് എത്തുമെന്നാണ് കരുതുന്നത്.
പന്തലിന്റെ വശങ്ങളില് വീഡിയോ വാള് ഒരുക്കും. തിങ്കളാഴ്ച രാവിലെ 10-ന് നടക്കുന്ന സത്യപ്രതിജ്ഞ കാണുന്നതിനായി നിശാഗന്ധി ഉള്പ്പെടെ നഗരത്തിന്റെ വിവിധയിടങ്ങളില് വലിയ സ്ക്രീനുകളും സ്ഥാപിക്കും. സത്യപ്രതിജ്ഞാച്ചടങ്ങുകള് പൂര്ത്തിയായശേഷം മന്ത്രിമാര് ലോക്ഭവനില് ഗവര്ണറുടെ സത്കാരത്തില് പങ്കെടുക്കും.
പിന്നീട് മന്ത്രിസഭാ യോഗം ചേര്ന്ന് നിയമസഭ ചേരുന്നതിനുള്ള ശുപാര്ശ ഗവര്ണര്ക്ക് സമര്പ്പിക്കും.എം.എല്.എ.മാരുടെ സത്യപ്രതിജ്ഞ മേയ് 21, സ്പീക്കര് തിരഞ്ഞെടുപ്പ് മേയ് 22, ഗവര്ണറുടെ നയപ്രഖ്യാപനം മേയ് 29, സംസ്ഥാന ബജറ്റ് ജൂണ് അഞ്ച് എന്നിങ്ങനെയാണ് ക്രമീകരണം.
