കോഴിക്കോട്: തപസ്യ കലാസാഹിത്യ വേദിയുടെ സുവര്ണോത്സവത്തിന്റെ സമാപനത്തിന് ഇന്ന് കോഴിക്കോട് കണ്ടന്കുളം ജൂബിലി ഹാളില് തിരിതെളിയും.
പ്രശസ്ത തമിഴ് നോവലിസ്റ്റ് ആര്.എന്. ജോ ഡിക്രൂസ് രാവിലെ 50ാം വാര്ഷികോത്സവം ഉദ്ഘാടനം ചെയ്യും. പ്രശസ്ത ബംഗാള് നാടോടി സംഗീതജ്ഞന് ഡോ. സ്വപന് മുഖോപദ്ധ്യായ മുഖ്യാതിഥിയാകും. ഭാരതീയ വിചാരകേന്ദ്രം ഡയറക്ടര് ആര്. സഞ്ജയന്, പി.ആര്. നാഥന് എന്നിവര് സംസാരിക്കും. അക്കിത്തം ജന്മശതാബ്ദി സമ്മേളനത്തില് മഹാകവി അക്കിത്തം പുരസ്കാരം കവി വി. മധുസൂദനന് നായര്ക്ക് സമര്പ്പിക്കും. അക്കിത്തത്തെ കുറിച്ച് ഡോ. ജി. പ്രഭ സംവിധാനം ചെയ്ത ഡോക്യുമെന്ററിയുടെ പ്രദര്ശനവും നടക്കും. 3ന് ഒ.വി. വിജയന്റെ സാഹിത്യ ദര്ശനത്തെ കുറിച്ച് സെമിനാര്. ആഷാമേനോന് ഉദ്ഘാടനം ചെയ്യും. റഷീദ് പാനൂര്, ശ്രീജിത്ത് മൂത്തേടത്ത് എന്നിവര് സംസാരിക്കും. ഗുരുസാഗരം നോവലിന്റെ ചിത്രാവിഷ്കാരവും നടക്കും.
നാളെ രാവിലെ എട്ടിന് പ്രതിനിധി സമ്മേളനം നടക്കും, തുടര്ന്ന് വി.എം. കൊറാത്ത് ജന്മശതാബ്ദിയോടനുബന്ധിച്ച് മാധ്യമ സെമിനാര്, തുടര്ന്ന് ചലച്ചിത്ര വിചാരം, കാവ്യസായാഹ്നം, കഥകളി സംഗീതം, നൃത്തസന്ധ്യ എന്നിവ നടക്കും.
