കൊച്ചി: വൈറല് താരത്തിന്റെ വിവാഹ കേസില് ഹൈക്കോടതിയിലെ പ്രമുഖ അഭിഭാഷകന് അഡ്വ. വി. സജിത് കുമാറിനെ മധ്യപ്രദേശ് സര്ക്കാരിന്റെ സ്പെഷല് പ്രോസിക്യൂട്ടറായി നിയമിച്ചു. സജിത്തും അഡീ. സോളിസിറ്റര് ജനറല് എസ്.വി. രാജുവുമാകും പോക്സോ കേസിലെ പ്രതികളായ ഫര്മാന് ഖാനും മറ്റുള്ളവരും ഹൈക്കോടതിയില് നല്കിയ ജാമ്യഹര്ജിയില്, മധ്യപ്രദേശ് സര്ക്കാരിനെ പ്രതിനിധീകരിക്കുക.
കുംഭമേളയില് മാല വിറ്റ് നടന്ന മധ്യപ്രദേശ് സ്വദേശിനിയായ പെണ്കുട്ടി അന്ന് സമൂഹമാധ്യമങ്ങളില് വൈറലായിരുന്നു. തുടര്ന്ന് സിനിമയില് അഭിനയിപ്പിക്കാമെന്ന് പറഞ്ഞ് ഫര്മാന് ഖാന് എന്നയാള് പെണ്കുട്ടിയെ പ്രേമിച്ച് പാട്ടിലാക്കി കേരളത്തില് എത്തിച്ച് വിവാഹം കഴിക്കുകയായിരുന്നു. സിപിഎം സംസ്ഥാന സെക്രട്ടറി എം.വി. ഗോവിന്ദനും എംപി എ.എ. റഹീമും അടക്കമുള്ളവര് ചേര്ന്നാണ് തിരുവനന്തപുരത്തെ സിപിഎംകാര് ഭരിക്കുന്ന ഒരു ക്ഷേത്രത്തില് വച്ച് ഫര്മാന് ഖാന് പെണ്കുട്ടിയെ വിവാഹം കഴിപ്പിച്ചു നല്കിയത്. പെണ്കുട്ടിയുടെ മാതാപിതാക്കള് എത്തി കരഞ്ഞ് പറഞ്ഞിട്ടും വിട്ടുനല്കിയില്ല, 16 വയസുമാത്രമുള്ള പെണ്കുട്ടിയെ 18 വയസ് തികഞ്ഞുവെന്ന് വ്യാജ സര്ട്ടിഫിക്കറ്റ് ഹാജരാക്കിയാണ് വിവാഹം കഴിപ്പിച്ചത്. തുര്ടന്ന് ദേശീയ പട്ടികവര്ഗ കമ്മിഷന്റെ ഉത്തരവ് പ്രകാരം ഫര്മാന് ഖാന് അടക്കമുള്ള പ്രതികള്ക്കെതിരെ മധ്യപ്രദേശ് സര്ക്കാര് പോക്സോ കേസും പട്ടിക വര്ഗ പീഡനത്തിനെതിരായ കേസും ചുമത്തിയിരുന്നു. റിക്കി എന്ന വ്യാജപ്പേരില് ഫര്മാന് ഖാന്, കാര്യമായ വിദ്യാഭ്യാസമില്ലാത്ത പെണ്കുട്ടിയുടെ അമ്മയെ വ്യാജ രേഖകളില് ഒപ്പിടീച്ചാണ്, വയസ് തികഞ്ഞുവെന്ന വ്യാജ രേഖയുണ്ടാക്കിയത്. പോക്സോ കേസില് ഫര്മാനും മറ്റു പ്രതികളും ഹൈക്കോടതിയില് ജാമ്യ ഹര്ജി നല്കിയിട്ടുണ്ട്.
