തിരുവനന്തപുരം: മുഖ്യമന്ത്രിയെ തീരുമാനിക്കുന്നതില് മുസ്ലിം ലീഗിന് കീഴടങ്ങി കോണ്ഗ്രസ്. വി.ഡി. സതീശന് മുഖ്യമന്ത്രി സ്ഥാനം നല്കിയത് ലീഗിന്റെ കടുംപിടിത്തത്തിന് വഴങ്ങി. കെ.സി. വേണുഗോപാലിനെ അല്ലെങ്കില് രമേശ് ചെന്നിത്തലയെ മുഖ്യമന്ത്രി സ്ഥാനത്തേക്ക് കൊണ്ടുവരാനുള്ള കോണ്ഗ്രസ് ഹൈക്കമാന്ഡ് നീക്കം ലീഗ് കണ്ണുരുട്ടിയതോടെ മാറ്റേണ്ടി വന്നു. കോണ്ഗ്രസ് ഹൈക്കമാന്ഡ് ചുമതല പാണക്കാട് തങ്ങളിലെത്തി.
മുസ്ലിം ലീഗിന്റെയും, ജമാ അത്തെ ഇസ്ലാമിയുടെയും പ്രതിനിധിയായിട്ടാണ് സതീശന് മുഖ്യമന്ത്രി സ്ഥാനത്തേക്ക് എത്തുന്നത്. എപ്പോഴും സമ്മര്ദതന്ത്രം ചെലുത്തി ഭരണത്തിന്റെ കടിഞ്ഞാണ് തങ്ങളില് നിലനിര്ത്തുകയെന്നതാണ് ലീഗിന്റെ കുടിലതന്ത്രം. ഉമ്മന് ചാണ്ടി മന്ത്രിസഭയില് അഞ്ചാം മന്ത്രി സ്ഥാനത്തിനായി സമ്മര്ദം ചെലുത്തി ലീഗ് കാര്യം നേടിയെടുത്തതു മുതല് കോണ്ഗ്രസിന്റെ കടിഞ്ഞാണ് ലീഗിന്റെ കൈയിലാണ്. പന്ത് കെസിയുടെ കോര്ട്ടിലെത്തിയെങ്കിലും ജനഹിതം വിഡിക്ക് അനുകൂലമാണെന്ന് വരുത്തിത്തീര്ക്കാന് സംസ്ഥാനത്തുടനീളം ജാഥകള് സംഘടിപ്പിച്ചതിനു പിന്നിലും ലീഗായിരുന്നു. ലീഗിനെ തൃപ്തിപ്പെടുത്തിയാലേ കോണ്ഗ്രസിന് സംസ്ഥാനത്ത് നിലനില്പ്പുള്ളൂ. അതിനാല് ലീഗ് പറയുന്നതെന്തിനും കോണ്ഗ്രസ് വഴങ്ങും. 102 സീറ്റ് നേടിയ യുഡിഎഫിന് ലീഗ് ഇല്ലെങ്കിലും മറ്റ് ഘടകകക്ഷികളുമായി ചേര്ന്ന് ഭരണം നടത്താവുന്നതേയുള്ളൂ. എന്നാല് രാഹുല് ഗാന്ധിക്കും പ്രിയങ്ക ഗാന്ധിക്കും ലീഗിനെ പിണക്കാനാകില്ല
മുസ്ലിം ലീഗും ജമാ അത്തെ ഇസ്ലാമിയും പറയുന്നതനുസരിച്ചില്ലെങ്കില് അടുത്ത ലോക്സഭാ തെരഞ്ഞെടുപ്പില് കേരളത്തില് നിന്ന് കോണ്ഗ്രസിന് കിട്ടാവുന്ന ലോക്സഭാ സീറ്റുകള് വലിയ തോതില് കുറയുകയും ചെയ്യും. അതിനാല് തങ്ങള് പറയുന്നതനുസരിക്കണമെന്ന ഭീഷണിയും ഇരുകൂട്ടരും കോണ്ഗ്രസ് നേതൃത്വത്തെ അറിയിച്ചു. ലോക്സഭാ തെരഞ്ഞെടുപ്പില് കോണ്ഗ്രസിന്റെ പിടിവള്ളിയാണ് കേരളം. തെരഞ്ഞെടുപ്പില് കേരളത്തില് വന്ന് മത്സരിക്കുന്ന പ്രിയങ്ക ഗാന്ധിക്കോ രാഹുല് ഗാന്ധിക്കോ വിജയിക്കണമെങ്കില് ലീഗിനെ കൂടെ നിര്ത്തണം. ലീഗ് കൂടെയുണ്ടെങ്കില് വിജയം സുനിശ്ചിതം എന്നാണ് ഇരുവരുടെയും കണക്കുകൂട്ടല്.
കോണ്ഗ്രസുകാര് ഇനി സാമുദായിക നേതാക്കളുടെ തിണ്ണ നിരങ്ങില്ലെന്ന് പറഞ്ഞ വി.ഡി. സതീശന്, പാണക്കാട് തിണ്ണയില് നിരവധി തവണ നിരങ്ങിയാണ് മുഖ്യമന്ത്രി സ്ഥാനത്ത് എത്തുന്നത്. തെരഞ്ഞെടുപ്പ് വിജയാഹ്ലാദം താലിബാന് ഭീകരവാദികളെ പോലെ നടത്തിയതിന് കേരളം മുഴുവന് പ്രതിഷേധം ഉയര്ന്നപ്പോള് ജമാ അത്തിനെതിരേയോ ലീഗിനെതിരേയോ ഒരു വാക്കു പോലും കോണ്ഗ്രസ് ഇതുവരെയും പറഞ്ഞിട്ടുമില്ല.
ജന്മഭൂമി ഓണ്ലൈന്