കോഴിക്കോട്: ആദ്ധ്യാത്മികാചാര്യനും ചിന്തകനുമായ പി. മാധവ്ജിയുടെ സ്മരണയ്ക്ക് കേരളാ ക്ഷേത്ര സംരക്ഷണ സമിതി ഏര്പ്പെടുത്തിയ കേരളാ ക്ഷേത്ര പുരസ്കാരം പ്രമുഖ ആദ്ധ്യാത്മിക പണ്ഡിതനും ശ്രേഷ്ഠാചാരസഭ ആചാര്യനുമായ എം.ടി. വിശ്വനാഥന്. പ്രൊഫ പി.എം. ഗോപി, എം. മോഹനന്, സി.കെ. കുഞ്ഞ്, ഡോ. വിജയരാഘവന്, ഇ. കുഞ്ഞിരാമന് നായര്, മുല്ലപ്പള്ളി കൃഷ്ണന് നമ്പൂതിരി, കെ.എസ്. നാരായണന് എന്നിവരടങ്ങിയ സമിതിയാണ് പുരസ്കാര ജേതാവിനെ തെരഞ്ഞെടുത്തത്. 24ന് കോഴിക്കോട് നടക്കുന്ന കേരളാ ക്ഷേത്ര സംരക്ഷണ സമിതിയുടെ അറുപതാം വാര്ഷിക സമ്മേളനത്തില് പുരസ്കാരം സമര്പ്പിക്കും.
2008ല് കോഴിക്കോട് നടത്തിയ ‘സൗത്രാമണി മഹായാഗ’ത്തിന്റെ മുഖ്യ സംഘാടകനും ആചാര്യനുമായിരുന്ന വിശ്വനാഥന് 108 അഗ്നികുണ്ഡങ്ങളില് ഒരേസമയം നടത്തിയ ഗായത്രീമഹായജ്ഞത്തിന്റേയും മുഖ്യ ആചാര്യസ്ഥാനമലങ്കരിച്ചിരുന്നു. പ്രമുഖ ആദ്ധ്യാത്മികാചാര്യനായിരുന്ന കണ്ണൂര് മണത്തണ ചാപ്പാരം ദാരപ്പശാരില് നിന്ന് ശ്രീവിദ്യാമന്ത്രത്തിന്റെ പൂര്ണദീക്ഷ സ്വീകരിച്ച വിശ്വനാഥന് പാലിയം വിളംബരത്തിലൂടെ മാധവ്ജി മുന്നോട്ടുവെച്ച ആശയങ്ങള് സമാജത്തില് നടപ്പിലാക്കാനുള്ള പ്രവര്ത്തനത്തിന്റെ ഭാഗമായി ജാതി- ലിംഗ ഭേദമന്യേ ആചാരാനുഷ്ഠാനങ്ങളിലും പൂജാവിധികളിലും മൂന്നര ദശാബ്ദമായി പരിശീലനം നല്കി വരികയാണ്.
വിദ്യാഭ്യാസ കാലം മുതല് രാഷ്ട്രീയ സ്വയംസേവക സംഘത്തില് പ്രവര്ത്തനം തുടങ്ങിയ അദ്ദേഹം അടിയന്തരാവസ്ഥയ്ക്കെതിരായ പോരാട്ടത്തില് പോലീസ് മര്ദനത്തിനിരയായി. കേരള ക്ഷേത്രസംരക്ഷണ സമിതിയുടെ മുഴുവന് സമയ പ്രവര്ത്തകനായിരുന്നു.
