പൂനെ: മഹാരാഷ്ട്രയിലെ ബാരാമതി വിമാനത്താവളത്തിന് സമീപം ബുധനാഴ്ച വീണ്ടും വിമാനാപകടം. റെഡ്ബേര്ഡ് ഏവിയേഷന്റെ ഉടമസ്ഥതയിലുള്ള പരിശീലന വിമാനമാണ് ഗോജുബാവി ഗ്രാമപരിധിയില് തകര്ന്നു വീണത്. വിമാനത്തിലുണ്ടായിരുന്ന ട്രെയിനി പൈലറ്റ് ഗുരുതരമായ പരുക്കുകളില്ലാതെ അത്ഭുതകരമായി രക്ഷപ്പെട്ടു.
പുനെ റൂറല് പോലീസ് എസ്പി സന്ദീപ് സിംഗ് ഗില് നല്കുന്ന വിവരങ്ങള് പ്രകാരം രാവിലെ എട്ട് മണിയോടെയാണ് അപകടം നടന്നത്. താഴ്ന്ന് പറക്കുന്നതിനിടെ വിമാനത്തിന് സാങ്കേതിക തകരാര് അനുഭവപ്പെടുകയായിരുന്നു. അടിയന്തര ലാന്ഡിംഗിന് ശ്രമിക്കുന്നതിനിടെ വിമാനത്തിന്റെ ഒരു ഭാഗം വൈദ്യുതി പോസ്റ്റില് ഇടിക്കുകയും തുടര്ന്ന് നിലംപതിക്കുകയുമായിരുന്നു. സംഭവം നടന്ന ഉടന് തന്നെ പോലീസും എമര്ജന്സി റെസ്ക്യൂ ടീമും സ്ഥലത്തെത്തി അന്വേഷണം ആരംഭിച്ചു.
