ന്യൂദല്ഹി: തുടര്ച്ചയായ നാലാം വര്ഷവും റിക്കാര്ഡ് ലാഭവുമായി പൊതുമേഖലാ ബാങ്കുകള്. 2025- 26 സാമ്പത്തിക വര്ഷത്തില് 1.98 ലക്ഷം കോടി രൂപയുടെ ലാഭമാണ് പൊതുമേഖലാ ബാങ്കുകള് കൈവരിച്ചത്. 2026 മാര്ച്ച് 31ലെ കണക്കനുസരിച്ച് പൊതുമേഖലാ ബാങ്കുകളുടെ ആകെ ഇടപാടുകള് 283.3 ലക്ഷം കോടിയായി വര്ദ്ധിച്ചു, മുന് വര്ഷത്തെ അപേക്ഷിച്ച് 12.8% വളര്ച്ച. ആകെ നിക്ഷേപം 156.3 ലക്ഷം കോടിയായി, മുന് വര്ഷത്തേക്കാള് 10.6% വര്ദ്ധനവ്.
ഓരോ പൊതുമേഖലാ ബാങ്കും 90 ശതമാനത്തിന് മുകളില് കരുതല് ധനഅനുപാതം നിലനിര്ത്തി. കിട്ടാക്കടത്തിന്റെ അനുപാതം 0.7 ശതമാനമായി കുറഞ്ഞു. എഴുതിത്തള്ളിയ അക്കൗണ്ടുകളിലേതടക്കം ആകെ 86,971 കോടി രൂപയാണ് തിരിച്ചുപിടിച്ചത്.
ആകെ വായ്പകള് 127 ലക്ഷം കോടിയായി, 15.7% വളര്ച്ച. വ്യക്തിഗത ഇടപാടുകള്, കൃഷി, സൂക്ഷ്മ- ചെറുകിട- ഇടത്തരം സംരംഭങ്ങള് എന്നീ വിഭാഗങ്ങളിലെ വായ്പകളില് 18.1%, 15.5%, 18.2% വളര്ച്ച രേഖപ്പെടുത്തി. 2025- 26ല് പൊതുമേഖലാ ബാങ്കുകളുടെ ആസ്തി ഗുണനിലവാരം ഗണ്യമായി മെച്ചപ്പെട്ടു. മാര്ച്ച് 31ലെ കണക്കനുസരിച്ച് ആകെ നിഷ്ക്രിയ ആസ്തി അനുപാതം 1.93 ശതമാനമായും അറ്റ നിഷ്ക്രിയ ആസ്തി അനുപാതം 0.39 ശതമാനമായും കുറഞ്ഞു. ഇത് കിട്ടാക്കടങ്ങളുടെ ചരിത്രത്തിലെ ഏറ്റവും കുറഞ്ഞ നിലയാണ്. ബാങ്കുകളുടെ ആകെ പ്രവര്ത്തനലാഭം 3.21 ലക്ഷം കോടി രൂപയിലെത്തി. മൊത്തം അറ്റാദായം 11.1% വര്ദ്ധിച്ച് ചരിത്ര നേട്ടമായ 1.98 ലക്ഷം കോടി രൂപയിലെത്തി. പൊതുമേഖലാ ബാങ്കുകള് തുടര്ച്ചയായി ലാഭം രേഖപ്പെടുത്തുന്ന നാലാം വര്ഷമാണിത്.
പൊതുമേഖലാ ബാങ്കുകളുടെ പ്രകടനത്തിലെ തുടര്ച്ചയായ പുരോഗതി സമ്പദ് വ്യവസ്ഥയുടെ പ്രതിരോധശേഷിയേയും ബാങ്കിങ് മേഖലയെ ശക്തിപ്പെടുത്താന് സര്ക്കാര് നടപ്പാക്കുന്ന പരിഷ്കാരങ്ങളെയും സൂചിപ്പിക്കുന്നു.
