കോട്ടയം: ഇടുക്കി പൂപ്പാറയില് പന്നിയാര്പ്പുഴ കൈയേറി അനധികൃതമായി പണിത പള്ളിയടക്കമുള്ള 88 കെട്ടിടങ്ങളില് മിക്കവയും പൊളിച്ചു. ഒരാഴ്ചയ്ക്കുള്ളില് പൊളിക്കല് പൂര്ത്തിയായേക്കും. ഈ ഏഴിനാണ് പൊളിക്കല് തുടങ്ങിയത്. ജന്മഭൂമി വാര്ത്തയുടെ അടിസ്ഥാനത്തില് പരിസ്ഥിതി പ്രവര്ത്തകന് എം.എന്. ജയചന്ദ്രന്റെ ഹര്ജി പ്രകാരമാണ് ഹൈക്കോടതി, സുപ്രീം കോടതി ഉത്തരവുകളനുസരിച്ചുള്ള നടപടി. പൊളിക്കാന് ഉത്തരവിട്ടതില് 56 കെട്ടിടങ്ങളും ഉടമകളായിരുന്നു പൊളിക്കേണ്ടത്. ബാക്കി റവന്യൂ വകുപ്പും.
പുഴ കൈയേറി പെന്തക്കോസ്ത് പള്ളിയടക്കം നിരവധി കെട്ടിടങ്ങള് അനധികൃമായി പണിയുന്നത് ചൂണ്ടിക്കാട്ടി 2021 ജനുവരി 29നാണ് ജന്മഭൂമി വാര്ത്ത നല്കിയത്. വാര്ത്ത വിവാദമായെങ്കിലും അധികൃതര് അനങ്ങിയില്ല, നടപടിയൊന്നുമെടുത്തുമില്ല. തുടര്ന്ന് ജയചന്ദ്രന് സംസ്ഥാന ജൈവ വൈവിധ്യ ബോര്ഡിനു പരാതി നല്കി. ഇതോടെ നടപടിയെടുക്കാതിരിക്കാനായില്ല.
തുടര്ന്ന് ഇക്കാര്യങ്ങള് അന്വേഷിക്കാന് 2012 ഫെബ്രുവരി എട്ടിന് ജൈവ വൈവിധ്യ ബോര്ഡ് ശാന്തമ്പാറ ഗ്രാമപഞ്ചായത്തിനും വൈവിധ്യ ബോര്ഡ് ഇടുക്കി ജില്ലാ കോ ഓര്ഡിനേറ്റര്ക്കും നിര്ദേശം നല്കി. പഞ്ചായത്തിന്റെയും കോ ഓര്ഡിനേറ്റേറുടെയും റിപ്പോര്ട്ട് പ്രകാരം പുഴയ്ക്കു സമീപമുള്ള കെട്ടിടം പണി നിര്ത്തിച്ച്, പഞ്ചായത്തിനെക്കൊണ്ട് കെട്ടിടം പണിക്കു സ്റ്റോപ്പ് മെമ്മോ നല്കിച്ചു. എന്നാല് പണി പുഴയുടെ ഒഴുക്കു തടസപ്പെടുത്തുന്നതായോ ജൈവ വൈവിധ്യ ശോഷണമുള്ളതായോ ബോധ്യപ്പെട്ടിട്ടില്ലെന്നായിരുന്നു ബോര്ഡിന്റെ ഔദ്യോഗിക റിപ്പോര്ട്ട്. ഇതിനെതിരേ ജയചന്ദ്രന് ജൈവ വൈവിധ്യ ബോര്ഡിനു വീണ്ടും കത്തു നല്കി. റിപ്പോര്ട്ട് തള്ളണമെന്നും കൈയേറ്റങ്ങള്ക്കെതിരേ നടപടി വേണമെന്നും അല്ലെങ്കില് കൈയേറ്റം വ്യാപകമാകുമെന്നും കത്തില് അദ്ദേഹം ചൂണ്ടിക്കാട്ടി.
വൈവിധ്യ ബോര്ഡിന്റെ കള്ളക്കളിക്കെതിരേ ജയചന്ദ്രന്റെ നേതൃത്തില് പൂപ്പാറയിലെ പരിസ്ഥിതി പ്രവര്ത്തകര് ജന്മഭൂമി റിപ്പോര്ട്ട് ചൂണ്ടിക്കാട്ടി ഹൈക്കോടതിയെ സമീപിച്ചു. കൈയേറ്റങ്ങള് പൊളിച്ചുനീക്കാനും പരിസ്ഥിതി സംരക്ഷിക്കാനുമായിരുന്നു ഹൈക്കോടതി ഉത്തരവ്. ഇതിനെതിരേ പള്ളിയധികൃതരും കെട്ടിട ഉടമകളും സുപ്രീം കോടതിയില് അപ്പീല് നല്കി. അപ്പീല് തള്ളിയ സുപ്രീം കോടതി കൈയേറ്റങ്ങളും കെട്ടിടങ്ങളും പൊളിക്കാനുള്ള 2023 ജനുവരിയിലെ ഹൈക്കോടതി ഉത്തരവ് ശരിവച്ചു. ഇതു പ്രകാരമാണ് ഈ ഏഴിന് പൊളിക്കല് തുടങ്ങിയത്. നദീതടത്തില് പണിതിരുന്ന 59 കടകളും 29 വീടുകളുമാണ് പൊളിക്കുന്നത്. വീടു നഷ്ടപ്പെടുന്ന 15 കുടുംബങ്ങള്ക്ക് അവ നല്കാമെന്ന് പഞ്ചായത്ത് കോടതിക്ക് ഉറപ്പു നല്കിയിട്ടുണ്ട്. അനധികൃത കെട്ടിടങ്ങള് ഒഴിപ്പിച്ചെടുക്കുന്ന ഭൂമി പുഴയെ പുനരുജ്ജീവിപ്പിക്കാന് ഉപയോഗിക്കാനാണ് കോടതി നിര്ദേശം.
