ചെന്നൈ: ഒരിയ്‌ക്കല്‍ സനാതനധര്‍മ്മത്തെ ഡെങ്കിപ്പനി പോലെ നിരോധിക്കണമെന്ന് വിളിച്ചുപറഞ്ഞയാളാണ് ഉദയനിധി സ്റ്റാലിന്‍. അന്ന് ഭരണത്തിന്റെ അഹന്തയുണ്ടായിരുന്നു. മുരുകന്‍ മലയ്‌ക്ക് മുകളിലെ ദീപത്തൂണില്‍ വിളക്ക് കൊളുത്താന്‍ അനുവദിക്കാതെ മുരുകനെ വെറുപ്പിച്ചയാളായിരുന്നു സ്റ്റാലിന്‍. മുരുകന്‍ മലയ്‌ക്ക് കീഴില്‍ മുസ്ലിങ്ങളുടെ പള്ളികെട്ടിപ്പൊക്കാന്‍ രഹസ്യമായി സ്റ്റാലിന്‍ കൂട്ടുനിന്നതായി ചില റിപ്പോര്‍ട്ടുകള്‍ പുറത്തുവന്നിരുന്നു. സൂഫി സന്യാസിയായ സിക്കന്ദറുടെ മലയാണ് മുരുകന്‍ മല എന്ന് വരെയാക്കാന്‍ സ്റ്റാലിന്‍ കൂട്ടുനിന്നു.
ഒടുവില്‍ എന്ത് സംഭവിച്ചു. സനാതനധര്‍മ്മത്തെ വേരോടെ പിഴുതെറിയാന്‍ ശ്രമിച്ച അച്ഛന്‍ തെരഞ്ഞെടുപ്പില്‍ തോറ്റു. അവരുടെ പാര്‍ട്ടിയായ ഡിഎംകെ ഭരണത്തില്‍ നിന്നും തൂത്തെറിയപ്പെട്ടു. എന്നാല്‍ ഇതുകൊണ്ടൊന്നും സ്റ്റാലിന്‍ കുടുംബത്തിന് മതിയായിട്ടില്ല.
വിജയ് മുഖ്യമന്ത്രിയായി തുടക്കം കുറിച്ച പുതിയ സര്‍ക്കാര്‍ നിയസഭാ നടപടികള്‍ തുടങ്ങിവെച്ച ആദ്യദിവസം തന്നെ സ്റ്റാലിന്റെ മകന്‍ വീണ്ടും സനാതനധര്‍മ്മത്തെ കടന്നാക്രമിച്ചു. സനാതനധര്‍മ്മം തുടച്ചുനീക്കണമെന്നായിരുന്നു ഉദയനിധി സ്റ്റാലിന്റെ ആവശ്യം. തമിഴ്നാട് നിമയസഭയില്‍ വിജയ് സര്‍ക്കാര്‍ അധികാരമേറ്റെടുത്ത ശേഷം നടത്തിയ കന്നിപ്രസംഗത്തിലാണ് ഉദയനിധി സ്റ്റാലിന്‍ ഈ ആവശ്യം ഉന്നയിച്ചത്. ജനങ്ങളെ ഭിന്നിപ്പിക്കുന്നതിനാല്‍ സനാതനധര്‍മ്മം തുടച്ചുനീക്കണം എന്നതായിരുന്നു ഉദയനിധി സ്റ്റാലിന്റെ ആവശ്യം. കൂടുതല്‍ നാശം ഇരന്നുവാങ്ങുകയാണ് സ്റ്റാലിന്‍ കുടുംബം എന്ന കമന്‍റുകളാണ് ഇതിന് പ്രതികരണമായി സമൂഹമാധ്യമങ്ങളില്‍ നിറയുന്നത്.
