മലപ്പുറം: യുഡിഎഫില് മുഖ്യമന്ത്രി ആരെന്ന ചര്ച്ച ദല്ഹിയില് തകൃതിയില് നടക്കുമ്പോള് മന്ത്രിസഭയിലെ നിര്ണായക സ്ഥാനങ്ങള് ഉറപ്പിക്കാന് അടിയന്തര നീക്കവുമായി മുസ്ലിം ലീഗ്. മുഖ്യമന്ത്രി സ്ഥാനാര്ത്ഥിയെ പ്രഖ്യാപിച്ചാലുടന് തന്നെ പാണക്കാട് എത്താന് ലീഗ് നേതാക്കള്ക്ക് നിര്ദേശം നല്കി.
തെരഞ്ഞെടുപ്പിന് മുമ്പ് തന്നെ ഉപമുഖ്യമന്ത്രിപദം അടക്കം ആറ് മന്ത്രി സ്ഥാനവും ഡെ. സ്പീക്കര് പദവിയുമാണ് ലീഗ് ആവശ്യപ്പെട്ടത്. നിലവിലെ സാഹചര്യത്തിലും നിലപാടില് വിട്ടുവീഴ്ച്ച വേണ്ടെന്നാണ് ലീഗ് നേതൃത്വത്തിന്റെ തീരുമാനം.
2011ലെ മന്ത്രിസഭയില് ലീഗിന് അഞ്ച് മന്ത്രിമാരാണ് ഉണ്ടായിരുന്നത്. വി.ഡി. സതീശന് മുഖ്യമന്ത്രിയായാല് മുന് ധാരണപ്രകാരം പദവികള് ചോദിക്കാതെ തന്നെ ലീഗിലേക്ക് എത്തിച്ചേരും. തെരഞ്ഞെടുപ്പിന് മുമ്പ് തന്നെ നീക്കുപോക്കുകള് സതീശനുമായി ലീഗ് പറഞ്ഞുറപ്പിച്ചിരുന്നു. അതുകൊണ്ടു തന്നെയാണ് സതീശനെ മുഖ്യമന്ത്രിയാക്കണമെന്ന് ലീഗ് ശാഠ്യം പിടിക്കുത്. മുസ്ലിംലീഗ് സംസ്ഥാന അധ്യക്ഷന് സാദിഖലി തങ്ങളുടെ നിര്ദേശ പ്രകാരം ഇ.ടി. മുഹമ്മദ് ബഷീര് എംപി വിഡിക്ക് വേണ്ടി പ്രിയങ്ക ഗാന്ധി ഉള്പ്പടെയുള്ള കോണ്ഗ്രസ് ദേശീയ നേതാക്കളുമായി ആശയവിനിമയം നടത്തിയിരുന്നു.
സതീശന് പകരം മറ്റാരെങ്കിലും മുഖ്യമന്ത്രി സ്ഥാനത്തേക്ക് വന്നാല് ലീഗിന് സ്ഥാനമാനങ്ങള് ചോദിച്ചുവാങ്ങേണ്ടിവരും. ഇത് മുന്നില്ക്കണ്ടാണ് പ്രഖ്യാപനം കഴിഞ്ഞാല് നേതാക്കളോട് അടിയന്തരമായി പാണക്കാടെത്താന് ലീഗ് ആവശ്യപ്പെട്ടത്. തെരഞ്ഞെടുപ്പിന് മുമ്പ് കാട്ടിയ താത്പര്യം ഇപ്പോള് കോണ്ഗ്രസ് നേതൃത്വത്തിന് തങ്ങളോട് ഇല്ലെന്ന പരിഭവവും ലീഗിനുണ്ട്.
