തിരുവനന്തപുരം: രാഷ്ട്രത്തിന്റെ ആന്തരിക ചൈതന്യത്തെ വര്ധിത വീര്യത്തോടെ നിലനിര്ത്തുന്ന നിരന്തര പ്രവര്ത്തനമാണ് ആര്എസ്എസിന്റേതെന്ന് ആര്എസ്എസ് ക്ഷേത്രീയ സഹ ബൗദ്ധിക് പ്രമുഖ് കെ.പി. രാധാകൃഷ്ണന്.
മുഴുവന് വ്യക്തികളെയും ശാഖയിലെത്തിക്കുകയല്ല, മറിച്ച് രാഷ്ട്ര പരിവര്ത്തനത്തിനാവശ്യമായ വ്യക്തികളെ വാര്ത്തെടുത്ത് സമൂഹത്തിന്റെ സകല മേഖലകളിലും പരിവര്ത്തനത്തിനായി നിയോഗിക്കുകയാണ് ചെയ്യുന്നത്. സംഘം ഒരു ബഹുജനസംഘടനയല്ല, സമാജത്തിന്റെ സംഘടനയാണെന്നും അദ്ദേഹം പറഞ്ഞു. നെടുമങ്ങാട് കല്ലിയോട് എസ് വ്യാസ ഡീംഡ് യൂണിവേഴ്സിറ്റിയില് നടക്കുന്ന ദക്ഷിണ കേരളം പ്രാന്ത സംഘശിക്ഷാവര്ഗിലെ സമാപന പൊതുപരിപാടിയില് മുഖ്യപ്രഭാഷണം നടത്തുകയായിരുന്നു അദ്ദേഹം.
പരിസ്ഥിതി പ്രവര്ത്തകനായ ഡോ. വി.സുഭാഷ്ചന്ദ്രബോസ് അധ്യക്ഷനായി. ഭാരതത്തിന്റെ മണ്ണില് ഒരു ഹിന്ദുവായി പിറക്കാന് കഴിഞ്ഞതില് അഭിമാനിക്കുന്നവെന്ന് അദ്ദേഹം പറഞ്ഞു. 2000 വര്ഷങ്ങള് വിദേശീയ ശക്തികള് പരമാവധി ശ്രമിച്ചിട്ടും ഹിന്ദുത്വത്തെ തകര്ക്കാനായില്ലെന്നും അത് വടവൃക്ഷംപോലം വളര്ന്ന് പടരുകയാണ്. സംഘശിക്ഷാവര്ഗില് ലഭിച്ച പരിശീലനത്തിലൂടെ അതിനെ പരിപോഷിപ്പിക്കാന് നമുക്കാകണമെന്നും അദ്ദേഹം കൂട്ടിച്ചേര്ത്തു. പ്രാന്തസംഘചാലക് പ്രൊഫ. എം.എസ്. രമേശന്, വര്ഗ് സര്വാധികാരി ഡോ. ഡി. രാജേഷ് എന്നിവര് പങ്കെടുത്തു. വര്ഗ് കാര്യവാഹ് ആര്. ബാഹുലേയന് സ്വാഗതവും തിരുവനന്തപുരം വിഭാഗ് പ്രൗഢ പ്രമുഖ് ആര്. സുരേഷ്കുമാര് നന്ദിയും പറഞ്ഞു.
