ന്യൂദല്ഹി: ഭാരതത്തില് കുട്ടികള്ക്കെതിരായ ഓരോ പത്ത് കുറ്റകൃത്യങ്ങളില് ഒമ്പത് എണ്ണത്തിലും ലൈംഗികത ഉള്ളടക്കമാകുന്നുണ്ടെന്ന് നാഷണല് ക്രൈം റിക്കാര്ഡ് ബ്യൂറോ ഡാറ്റ. രാജ്യത്തുടനീളം ലൈംഗിക കുറ്റകൃത്യങ്ങളില് കുറവുണ്ടെങ്കിലും കുട്ടികള്ക്കെതിരായ കുറ്റകൃത്യങ്ങള് വര്ദ്ധിക്കുകയാണെന്നും വിദഗ്ധര് അറിയിച്ചു.
ചൈല്ഡ് റൈറ്റ്സ് ആന്ഡ് യു നടത്തിയ പുതിയ കണക്കുകള് പ്രകാരം കുട്ടികള് സൈബര് കുറ്റകൃത്യളില് ഇടപെടുന്നത് 0.7 ശതമാനം കൂടുതലാണെന്ന് പുതിയ പഠനം. എന്സിആര്ബിയുടെ ഡാറ്റ പ്രകാരം ഛത്തീസ്ഗഡിലാണ് ഏറ്റവും കൂടുതല് കുറ്റകൃത്യങ്ങള് കണ്ടെത്തിയത്. രാജസ്ഥാന്, ദല്ഹി, കേരളം എന്നിവയാണ് തൊട്ടുപിന്നില്. ഓണ്ലൈന് ഇടങ്ങളില് കുട്ടികളുടെ സുരക്ഷ കൂടുതല് ശക്തമാക്കേണ്ടതുണ്ട്, ആര്ട്ടിഫിഷ്യല് ഇന്റസിജന്സ്, അല്ഗോരിതം എന്നിവയുടെ സ്വാധീനമാണ് ഇത്തരത്തില് വര്ദ്ധനവിന് കാരണം, കുട്ടികളുടെ സ്ക്രീന് സമയം, ഉപയോഗം എന്നിവ നിയന്ത്രണ വിധേയമല്ലെന്നുവേണം മനസിലാക്കാന് എന്നും ചൈല്ഡ് റൈറ്റ്സ് ആന്ഡ് യു ചെയര്മാന് സോഹ മൊയ്ത്ര പറഞ്ഞു.
16നും 18നും ഇടയിലുള്ള പെണ്കുട്ടികളാണ് ഇതില് ഏറ്റവും കൂടുതല് ഇരകളാകുന്നത്. എന്നാല് രജിസ്റ്റര് ചെയ്ത കുറ്റകൃത്യങ്ങളില് 96.6 ശതമാനവും പെണ്കുട്ടികള്ക്ക് നേരിട്ടറിയാവുന്നവര് തന്നെയാണ് പ്രതികളാകുന്നത്. ഇത്തരത്തില് കുറ്റവാളികളാകുന്നവര് സുഹൃത്തുക്കള്, അല്ലെങ്കില് വിവാഹവാഗ്ദാനം നല്കി ഒന്നിച്ചു താമസിക്കുന്നവരാണ്.
ഓണ്ലൈനായും ഓഫ്ലൈനായും ഇത്തരത്തിലുള്ള കുറ്റകൃത്യങ്ങള് വര്ദ്ധിച്ചുവരികയാണ്, വലിയ തോതിലുള്ള സാമൂഹിക അവബോധം, ശക്തമായ പരിഹാര സംവിധാനങ്ങള് എന്നിവ ഇത്തരം കുറ്റകൃത്യങ്ങള് കുറയ്ക്കാന് ആവശ്യമാണെന്നും മൊയ്ത്ര ആവശ്യപ്പെട്ടു.
