തിരുവനന്തപുരം: മുഖ്യമന്ത്രിക്കായി എഐസിസി നിരീക്ഷകസംഘം തയാറാക്കിയ എംഎല്എമാരുടെ അഭിപ്രായം രേഖപ്പെടുത്തിയ ലിസ്റ്റ് പുറത്ത്. എഐസിസി നിരീക്ഷകന് മുകുള് വാസ്നിക്കിന്റെ പക്കലെ പട്ടിക പുറത്തുവന്നതോടെ കെപിസിസി അധ്യക്ഷന് സണ്ണി ജോസഫ് ഉള്പ്പെടെ എംഎല്എമാര് വെട്ടിലായി. ഓരോ എംഎല്എയും കെ.സി. വേണുഗോപാല്, വി.ഡി. സതീശന്, രമേശ് ചെന്നിത്തല എന്നിവരുടെ പേരുകള് നിര്ദേശിച്ചത് രേഖപ്പെടുത്തിയ ചിത്രമാണ് പുറത്തുവന്നത്.
തെരഞ്ഞെടുപ്പുഫലം വന്നതിനു പിന്നാലെ മുതല് സണ്ണി ജോസഫ് പറഞ്ഞിരുന്നത് തനിക്ക് പക്ഷമില്ലെന്നും ഹൈക്കമാന്ഡ് തീരുമാനിക്കട്ടെയെന്നുമാണ്. എന്നാല് മുകുള് വാസ്നിക് പക്കലുള്ള പേപ്പറില് കെ.സി. വേണുഗോപാലിനെയാണ് പിന്തുണച്ചിരിക്കുന്നത്. സണ്ണി ജോസഫ് മാത്രമല്ല സന്ദീപ് വാര്യര്, അഡ്വ. സജീവ് ജോസഫ്, അഡ്വ. ടി.ഒ. മോഹനന്, ഉഷ വിജയന്, അഡ്വ. ടി. സിദ്ദിഖ് എന്നിവരുടെ പിന്തുണയും വേണുഗോപാലിനാണ്. ചെന്നിത്തലയുടെ അനുയായി ഐ.സി. ബാലകൃഷ്ണന് ആദ്യം നല്കിയ പേര് വേണുഗോപാലിന്റെയാണ്. രണ്ടാമതായാണ് രമേശിന്റെ പേര് പറഞ്ഞത്.
വി.ഡി. സതീശന് വിസ്മയമെന്ന് പറഞ്ഞ് കോണ്ഗ്രസിലേക്കു കൊണ്ടുവന്ന സന്ദീപ് വാര്യര് പോലും വേണുഗോപാലിനെയാണ് പിന്തുണച്ചത്. ചിത്രങ്ങള് പുറത്തുവന്നതിനു പിന്നാലെ സന്ദീപിന്റെ കള്ളി വെളിച്ചത്തായി. ഇത് സതീശന് ഗ്രൂപ്പില് ഞെട്ടലുണ്ടാക്കിയിട്ടുണ്ട്. മുഖ്യമന്ത്രിപദത്തിനായി രംഗത്തുള്ള സതീശന് ആറും രമേശിന് എട്ടും എംഎല്എമാരുടെ പിന്തുണയേ കിട്ടിയുള്ളെന്നാണ് സൂചന. ഇതോടെ സതീശന് ജനവികാരമെന്ന പേരില് പാര്ട്ടി പ്രവര്ത്തകരെ തെരുവിലിറക്കി. ഇന്നലെ സെക്രട്ടറിയേറ്റിലേക്ക് ഉള്പ്പെടെ സതീശന് അനുകൂലികള് നടത്തിയ മാര്ച്ചില് വേണുഗോപാലിന്റെ ഫ്ളക്സുകള് വ്യാപകമായി നശിപ്പിച്ചു. വിവിധയിടങ്ങളില് വേണുഗോപാലിന്റെ ഫ്ളക്സില് കരി ഓയിലൊഴിച്ച് പ്രതിഷേധിച്ചിട്ടുണ്ട്.
