പത്തനംതിട്ട : റാന്നി കിക്കൊഴൂരില് യുവതിയെ വെട്ടി കൊന്ന കേസില് പ്രതി അതുല് സത്യന് 25 വര്ഷം കഠിനതടവും മൂന്നര ലക്ഷം രൂപ പിഴയും വിധിച്ചു.രഞ്ജിത(27)യെ കൊലപ്പെടുത്തിയ കേസിലാണ് പത്തനംതിട്ട അഡീഷണല് ജില്ലാ സെഷന്സ് കോടതി ശിക്ഷിച്ചത്. 2023 ജൂണ് 24 നായിരുന്നു കേസിന് ആധാരമായ സംഭവം.
നിരവധി കേസുകളില് പ്രതിയാണ് അതുല് സത്യന്. ഇയാളുടെ ഉപദ്രവം സഹിക്കവയ്യാതെ കൂടെ ജീവിച്ചിരുന്ന രഞ്ജിതയും മക്കളും സ്വന്തം വീട്ടിലേക്ക് പോയി. അതുലിനെതിരെ രഞ്ജിതയും മാതാപിതാക്കളും റാന്നി പൊലീസില് പരാതി നല്കിയിരുന്നു. ഇതിന്റെ വൈരാഗ്യത്തില് കീക്കൊഴൂരിലെ വീട്ടില് അതിക്രമിച്ചു കയറി വടിവാളുകൊണ്ട് രഞ്ജിതയെ വെട്ടി കൊലപ്പെടുത്തുകയായിരുന്നു. തടയാന് ശ്രമിച്ച രഞ്ജിതയുടെ അച്ഛനെയും അമ്മയെയും ഇളയ സഹോദരിയെയും പ്രതി മാരകമായി വെട്ടി പരിക്കേല്പ്പിച്ചു.
പിഴത്തുക കൊല്ലപ്പെട്ട രഞ്ജിതയുടെ മക്കള്ക്ക് നല്കണമെന്ന് കോടതി വിധിച്ചു.
