കൊല്ലം: ചവറ മുതല്‍ ചവറ വരെയുള്ള പാര്‍ട്ടിയെന്ന് ഒരുഘട്ടത്തില്‍ നെഹ്‌റു വിശേഷിപ്പിച്ച പാര്‍ട്ടിയാണ് ആര്‍എസ്പി. കഴിഞ്ഞ ഒരു പതിറ്റാണ്ടായി പാര്‍ട്ടിക്ക് നിയമസഭയില്‍ പ്രാതിനിധ്യമില്ല. ആകെയുള്ളത് കൊല്ലം ലോകസഭാ സീറ്റ് മാത്രമാണ്. ഇതില്‍ എന്‍.കെ. പ്രേമചന്ദ്രന്‍ തുടര്‍ച്ചയായി വിജയിക്കുന്നതിനാലാണ് സിപിഎമ്മിന്റെ പല വെല്ലുവിളികളും ആര്‍എസ്പി അതിജീവിച്ചത്.
അഞ്ചിടങ്ങളില്‍ മത്സരിച്ചെങ്കിലും ജില്ലയിലെ മൂന്ന് മണ്ഡലങ്ങളില്‍ വിജയിക്കാന്‍ ആര്‍എസ്പിക്കായത് പാര്‍ട്ടിക്ക് തന്നെ പുതുജീവനായി. ഇരവിപുരം, ചവറ, കുന്നത്തൂര്‍ മണ്ഡലങ്ങളിലാണ് ജയിച്ചത്. മൂന്നിടത്തും എല്‍ഡിഎഫിനെ മികച്ച മാര്‍ജിനിലാണ് തോല്‍പ്പിച്ചത്. എട്ട് സീറ്റില്‍ മത്സരിച്ച് ആറു സീറ്റില്‍ ജയിച്ച 1980ല്‍ ആര്‍എസ്പി മൂന്ന് ശതമാനം വോട്ടാണ് നേടിയത്. 1987ല്‍ അഞ്ച് സീറ്റിലും 1991ല്‍ രണ്ട് സീറ്റിലും 1996ല്‍ അഞ്ച് സീറ്റിലും വിജയിച്ചു. കൊല്ലം, ആലപ്പുഴ, തിരുവനന്തപുരം എന്നീ മൂന്ന് ജില്ലകളില്‍ വേരോട്ടമുള്ള ഈ പാര്‍ട്ടിയെ ശിഥിലമാക്കുന്നതില്‍ സിപിഎം വലിയ പങ്കാണ് വഹിച്ചിട്ടുള്ളത്. ഇടതുസ്വഭാവത്തില്‍ നിന്നുള്ള സിപിഎമ്മിന്റെ വ്യതിയാനത്തെ കാലാകാലങ്ങളില്‍ ചൂണ്ടിക്കാട്ടിയതോടെയാണ് ഈ വൈര്യം മൂര്‍ച്ഛിച്ചത്.
നാല്‍പ്പതുകളില്‍ ഇടത് പാര്‍ട്ടിയായി രൂപീകരിച്ച ആര്‍എസ്പി പില്‍ക്കാലത്ത് പല പിളര്‍പ്പുകളേയും നേരിട്ടു. 1970ല്‍ കോണ്‍ഗ്രസ് പങ്കാളിത്തമുള്ള മുന്നണിയില്‍ ആര്‍എസ്പി ചേര്‍ന്നത് കേന്ദ്രകമ്മിറ്റി ഒക്ടോബര്‍ മൂന്നിന് ചേര്‍ന്ന യോഗത്തില്‍ വിലക്കി. ബൂര്‍ഷ്വ പാര്‍ട്ടിയായ കോണ്‍ഗ്രസുമായി ചേരുന്നത് നയവിരുദ്ധമെന്ന് ചൂണ്ടിക്കാട്ടിയാണിത്. എന്നാല്‍ ഇതിനെതിരെ പ്രതികരിച്ച് കേരള ഘടകം പാര്‍ട്ടിവിട്ടു. ഇത് കേരളത്തില്‍ മാത്രമായി പ്രവര്‍ത്തിക്കുന്ന പാര്‍ട്ടിയായി. ശ്രീകണ്ഠന്‍ നായര്‍, ടി.കെ. ദിവാകരന്‍, ബേബി ജോണ്‍ എന്നിവരായിരുന്നു നേതൃത്വം. അതേസമയം ദേശീയ ആര്‍എസ്പി പി. പരമേശ്വരന്റ നേതൃത്വത്തില്‍ സംഘടിപ്പിച്ചു. ഈ വിഭാഗം സിപിഎമ്മുമായി യോജിച്ചു. എന്നാല്‍ ഇതിനിടയില്‍ കേരളഘടകം ആര്‍എസ്പിക്ക് സംസ്ഥാനപാര്‍ട്ടിയായി ഇലക്ഷന്‍ കമ്മിഷന്റെ അംഗീകാരം കിട്ടി. എന്നാല്‍ 1979ല്‍ കേരള ആര്‍എസ്പി ഇടത് മുന്നണിയില്‍ ചേര്‍ന്നപ്പോള്‍ ശ്രീകണ്ഠന്‍ നായരുടെ ഗ്രൂപ്പ് എതിര്‍ത്തു. പിന്നീട് പിളര്‍പ്പായി. ശ്രീകണ്ഠന്‍ഗ്രൂപ്പ് 1981ല്‍ യുഡിഎഫില്‍ ചേര്‍ന്നു. ബേബി ജോണിന്റെ ആര്‍എസ്പി എല്‍ഡിഎഫില്‍ തുടര്‍ന്നു. മറ്റ് രണ്ട് ആര്‍എസ്പികളും കാലക്രമേണ ഇല്ലാതായി. 1998ലാണ് ബേബി ജോണിന്റെ ആര്‍എസ്പി പിളര്‍ന്നത്. ഇങ്ങനെയുണ്ടായ ആര്‍എസ്പി ബേബിജോണ്‍ വിഭാഗം പിന്നീട് ഒന്നര പതിറ്റാണ്ട് മുമ്പ് ഷിബുവിന്റെ നേതൃത്വത്തില്‍ ഔദ്യോഗിക ആര്‍എസ്പിയില്‍ ലയിക്കുകയായിരുന്നു.
