ധാക്ക: മമതാ ബാനര്ജിയുടെ ടിഎംസി സര്ക്കാരിനെ പരാജയപ്പെടുത്തി ബിജെപി ബംഗാളില് സര്ക്കാര് രൂപീകരിച്ചാല് പ്രതിസന്ധിയിലാകുമെന്ന ആശങ്കയില് ബംഗ്ലാദേശ്. നാഷണല് സിറ്റിസണ് പാര്ട്ടി (എന്സിപി) പാര്ലമെന്റ് അംഗം അക്തര് ഹൊസൈന് ആണ് പാര്ലമെന്റില് ആശങ്ക പ്രകടിപ്പിച്ചത്.
ബംഗാളില് വോട്ടെടുപ്പിന് ശേഷമുള്ള വിലയിരുത്തലുകള് ബിജെപിയുടെ വിജയത്തിന് സാധ്യതയുണ്ടെന്ന് ഹൊസൈന് പറഞ്ഞു. ഇത് ധാരാളം രേഖകളില്ലാത്ത കുടിയേറ്റക്കാര് ബംഗ്ലാദേശിലേക്ക് മടങ്ങാന് ഇടയാക്കും. പെട്ടെന്ന് മടങ്ങിയെത്തുന്നവരുടെ ഒഴുക്ക് കാരണം അത്തരമൊരു സംഭവവികാസം ബംഗ്ലാദേശില് കാര്യമായ സമ്മര്ദ്ദം സൃഷ്ടിച്ചേക്കാമെന്ന് അദ്ദേഹം മുന്നറിയിപ്പ് നല്കി. ഇത്തരം നാടുകടത്തലുകള് നടക്കില്ലെന്ന് ഉറപ്പില്ല. അതിനാല്, നമ്മള് ഐക്യത്തോടെയും തയാറെടുപ്പോടെയും തുടരണമെന്നാണ് അദ്ദേഹം പറഞ്ഞത്.
അതേസമയം, ബംഗാളില് ബിജെപി സര്ക്കാര് അധികാരത്തില് വരുമെന്നും അനധികൃത കുടിയേറ്റത്തിനെതിരെ കര്ശന നടപടിയെടുക്കുമെന്നും ബംഗ്ലാദേശിലെ ജനങ്ങള് പോലും ഇപ്പോള് വിശ്വസിക്കുന്നുണ്ടെന്ന് ബിജെപി ദേശീയ വക്താവ് സയ്യിദ് ഷാനവാസ് ഹുസൈന് അഭിപ്രായപ്പെട്ടു.
ബിജെപി സര്ക്കാര് ഭരണത്തില് വന്നാല് രേഖകളില്ലാത്ത കുടിയേറ്റക്കാര് അവരുടെ ജന്മദേശത്തേക്ക് മടങ്ങേണ്ടിവരുമെന്ന് അദ്ദേഹം പ്രസ്താവിച്ചു.
ബംഗാള് മുഖ്യമന്ത്രി മമത ബാനര്ജി അത്തരം വ്യക്തികളെ അതിഥികളായി പരിഗണിക്കുമ്പോള്, ബിജെപി നയിക്കുന്ന ഭരണകൂടം വ്യത്യസ്തമായ സമീപനമായിരിക്കും സ്വീകരിക്കുക. ഭാരതീയര് അവരുടെ രാജ്യത്തെ സ്നേഹിക്കുന്നതുപോലെ ബംഗ്ലാദേശി പൗരന്മാരും സ്വന്തം രാജ്യത്തെ ബഹുമാനിക്കുകയും അവിടേക്ക് തിരികെ പോകുകയും ചെയ്യണമെന്ന് അദ്ദേഹം പറഞ്ഞു.
