ശ്രീനഗര്‍: ജമ്മു കശ്മീരിലെ പുല്‍വാമ ജില്ലയില്‍ വന്‍ ആയുധ ശേഖരവുമായി ഒരു ഭീകരന്‍ പിടിയില്‍. കാച്ചിപോറ സ്വദേശിയായ മുഹമ്മദ് ഉമര്‍ മാലിക്കിനെയാണ് പുല്‍വാമ പോലീസും രാഷ്‌ട്രീയ റൈഫിള്‍സും സിആര്‍പിഎഫ് 183-ാം ബറ്റാലിയനും സംയുക്തമായ നടത്തിയ ഓപ്പറേഷനിലൂടെ പിടികൂടിയത്.
രാജ്യവിരുദ്ധ പ്രവര്‍ത്തനങ്ങള്‍ക്കായി ലക്ഷ്യമിട്ട വലിയൊരു ആയുധശേഖരവും ഇയാളില്‍ നിന്ന് കണ്ടെടുത്തു. ഒരു പിസ്റ്റള്‍, നിരവധി വെടിയുണ്ടകള്‍, അതിമാരകമായ രണ്ട് ഗ്രനേഡുകള്‍ തുടങ്ങിയവയാണ് പിടിച്ചെടുത്ത സ്‌ഫോടക വസ്തുക്കളില്‍ ഉള്‍പ്പെടുന്നത്.
പ്രദേശത്ത് ഭീകരരുടെ സാന്നിധ്യമുണ്ടെന്ന രഹസ്യവിവരത്തെത്തുടര്‍ന്ന് ഇന്നലെ പുലര്‍ച്ചെയായിരുന്നു സൈന്യത്തിന്റെ നിര്‍ണായക നീക്കം. രാജ്‌പോറയിലെ കാസ്ബയര്‍ പ്രദേശം പൂര്‍ണമായും വളഞ്ഞ ശേഷമാണ് സൈന്യം ഭീകരനെ പിടികൂടിയത്. രാജ്‌പോറ പോലീസ് സ്റ്റേഷനില്‍ പ്രതിക്കെതിരെ കര്‍ശനമായ വകുപ്പുകള്‍ പ്രകാരം കേസെടുത്തു. കൂടുതല്‍ അന്വേഷണങ്ങള്‍ക്കായി പ്രതിയെ രഹസ്യ കേന്ദ്രത്തിലേക്ക് മാറ്റിയിരിക്കുകയാണ്. ഭീകരനെ ചോദ്യം ചെയ്യുന്നതിലൂടെ വലിയൊരു ഭീകരശൃംഖലയെത്തന്നെ തകര്‍ക്കാന്‍ കഴിയുമെന്ന പ്രതീക്ഷയിലാണ് സുരക്ഷാസേന. ഇതോടൊപ്പം മേഖലയില്‍ കൂടുതല്‍ ഭീകരര്‍ ഒളിച്ചിരിക്കുന്നുണ്ടോ എന്ന് കണ്ടെത്താന്‍ സൈന്യം തിരച്ചില്‍ ഊര്‍ജിതമാക്കി.
