ന്യൂദല്ഹി: തമിഴ്നാട്ടിലെ കല്പ്പാക്കത്തുള്ള ഫാസ്റ്റ് ബ്രീഡര് റിയാക്ടര് ‘ക്രിറ്റിക്കാലിറ്റി’ കൈവരിച്ചതിന് ആണവശാസ്ത്രജ്ഞര്ക്ക് പ്രധാനമന്ത്രി നരേന്ദ്ര മോദിയുടെ അഭിനന്ദനം. ആണവശാസ്ത്രജ്ഞര് രാജ്യത്തിന്റെ അഭിമാനം ഉയര്ത്തിയെന്നും മന് കി ബാത്ത് അഭിസംബോധനയില് പ്രധാനമന്ത്രി പറഞ്ഞു.
ഭാരതത്തിന്റെ ആണവോര്ജ്ജ യാത്രയിലെ ചരിത്രപരമായ നാഴികക്കല്ലാണിതെന്ന് പ്രധാനമന്ത്രി വിശേഷിപ്പിച്ചു. പൂര്ണമായും തദ്ദേശീയ സാങ്കേതികവിദ്യയിലാണ് ഈ റിയാക്ടര് നിര്മ്മിച്ചിരിക്കുന്നത്. ഊര്ജ്ജ ഉല്പ്പാദനത്തോടൊപ്പം ഭാവിയിലേക്കുള്ള പുതിയ ഇന്ധനവും ഈ ബ്രീഡര് റിയാക്ടര് ഉത്പാദിപ്പിക്കും. കാറ്റില് നിന്നുള്ള ഊര്ജ്ജ ഉത്പാദന രംഗത്തും വലിയ മുന്നേറ്റമാണ് നടത്തുന്നത്. ഈ രംഗത്ത് രാജ്യത്തിന്റെ ഉത്പാദന ശേഷി 56 ജിഗാവാട്ട് കടന്നു. ലോകത്ത് നാലാം സ്ഥാനത്താണ് ഇപ്പോള് ഭാരതമെന്നും അദ്ദേഹം പറഞ്ഞു.
ലോകത്തിലെ ഏറ്റവും വലിയ ജനസംഖ്യാ കണക്കെടുപ്പായ 2027ലെ സെന്സസ് പൂര്ണമായും ഡിജിറ്റലായിരിക്കുമെന്ന് പ്രധാനമന്ത്രി അറിയിച്ചു. വിവരങ്ങള് രേഖപ്പെടുത്താന് എന്യൂമറേറ്റര്മാര്ക്ക് മൊബൈല് ആപ്പ് നല്കും. ജനങ്ങള്ക്ക് സ്വന്തമായി വിവരങ്ങള് രേഖപ്പെടുത്താനുള്ള ‘സെല്ഫ് എന്യൂമറേഷന്’ സൗകര്യവുമുണ്ടാകും. എന്യൂമറേറ്റര്മാര് വീട്ടിലെത്തുന്നതിന് 15 ദിവസം മുമ്പ് ഈ സൗകര്യം ലഭ്യമാകും.
ഫ്രാന്സില് നടന്ന യൂറോപ്യന് ഗേള്സ് മാത്തമാറ്റിക്കല് ഒളിമ്പ്യാഡില് ആറാം സ്ഥാനം നേടിയ ശ്രേയ മുന്ദ്ര, സഞ്ജന ചാക്കോ, ശിവാനി ഭരത് കുമാര്, ശ്രീമോയി ബേര എന്നിവരെ പ്രധാനമന്ത്രി അഭിനന്ദിച്ചു.
