ഐഐടികളിലും മറ്റും ഈ വര്ഷത്തെ എന്ജിനീയറിങ്, സയന്സ്, ആര്ക്കിടെക്ചര് മുതലായ അണ്ടര്ഗ്രാഡുവേറ്റ് പ്രോഗ്രാമുകളില് പ്രവേശനത്തിനായുള്ള ജെഇഇ അഡ്വാന്സ്ഡ് കമ്പ്യൂട്ടര് അധിഷ്ഠിത പരീക്ഷ മേയ് 17 ന് ദേശീയതലത്തില് നടത്തും. ഇന്ത്യക്കകത്തും പുറത്തും പരീക്ഷാകേന്ദ്രങ്ങള് അനുവദിച്ചിട്ടുണ്ട്. ഐഐടി റൂര്ക്കിയാണ് പരീക്ഷ സംഘടിപ്പിക്കുന്നത്.
കേരളത്തില് തിരുവനന്തപുരം, കൊല്ലം, ആലപ്പുഴ, കോട്ടയം, കൊച്ചി, തൃശൂര്, മലപ്പുറം, കോഴിക്കോട്, പാലക്കാട്, കണ്ണൂര് നഗരങ്ങളില് പരീക്ഷാകേന്ദ്രങ്ങളുണ്ടാവും. പരീക്ഷയില് രണ്ട് പേപ്പറുകളാണുള്ളത്. പേപ്പര് ഒന്ന് രാവിലെ 9-12 മണിവരെയും പേപ്പര് രണ്ട് ഉച്ചക്കുശേഷം 2.30 മുതല് 5.30 മണിവരെയുമാണ്. ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങളിലാണ് ചോദ്യങ്ങള്. നിര്ബന്ധമായും രണ്ട് പേപ്പറുകളും അഭിമുഖീകരിക്കണം. നാഷണല് ടെസ്റ്റിങ് ഏജന്സി ഈ വര്ഷം നടത്തിയ ജെഇഇ മെയിന് പരീക്ഷയില് ഉയര്ന്ന സ്കോറുള്ള രണ്ടു ലക്ഷത്തിലധികം പേര്ക്ക് ജെഇഇ അഡ്വാന്സ്ഡില് പങ്കെടുക്കാം. വിശദവിവരങ്ങളടങ്ങിയ ‘ജെഇഇ അഡ്വാന്സ്ഡ് 2026’ ഇന്ഫര്മേഷന് ബുള്ളറ്റിന് https://jeeadv.ac.in- ല്നിന്നും ഡൗണ്ലോഡ് ചെയ്യാം. പരീക്ഷാ ഘടനയും സിലബസും മൂല്യനിര്ണയ-റാങ്കിങ് രീതിയും ഐഐടികളും കോഴ്സുകളും പ്രവേശന നടപടികളുമെല്ലാം ഇന്ഫര്മേഷന് ബുള്ളറ്റിനി
ലുണ്ട്.
രജിസ്ട്രേഷന്: മേയ് 2 രാത്രി 11.59 മണിവരെ ഓണ്ലൈനില് രജിസ്റ്റര് ചെയ്യാം. ഫീസ് 3200 രൂപ. വനിതകള്ക്കും പട്ടികജാതി/വര്ഗം, ഭിന്നശേഷി വിഭാഗങ്ങള്ക്ക് 1600 രൂപ. വിദേശത്ത് പരീക്ഷാകേന്ദ്രം സെലക്ട് ചെയ്യുന്നവര് 200 യുഎസ് ഡോളര് നല്കണം. സര്വ്വീസ്, പ്രോസസിങ് ചാര്ജ് കൂടി ഈടാക്കും. ഫീസ് മേയ് 4 രാത്രി 11.59 മണിവരെ സ്വീകരിക്കും. രജിസ്ട്രേഷനുള്ള നിര്ദ്ദേശങ്ങള് ഇന്ഫര്മേഷന് ബുള്ളറ്റിനിലുണ്ട്.
പരീക്ഷക്കുള്ള അഡ്മിറ്റ് കാര്ഡ് മേയ് 11-17 വരെ വെബ്സൈറ്റില്നിന്നും ഡൗണ്ലോഡ് ചെയ്യാം. പരീക്ഷ അഭിമുഖീകരിക്കുന്നതിന് ആവശ്യമായ യോഗ്യതകളും മാര്ഗനിര്ദ്ദേശങ്ങളും ഇന്ഫര്മേഷന് ബുള്ളറ്റിനിലുണ്ട്.
ജെഇഇ അഡ്വാന്സ്ഡ് ഫലം ജൂണ് ഒന്നിന് പ്രസിദ്ധപ്പെടുത്തും. ഒന്നും രണ്ടും പേപ്പറുകള്ക്ക് ലഭിച്ച മൊത്തം മാര്ക്ക് പരിഗണിച്ച് റാങ്ക്ലിസ്റ്റ് തയ്യാറാക്കും. കോമണ് റാങ്ക്ലിസ്റ്റില്പ്പെടുന്നതിന് ജനറല് വിഭാഗക്കാര് ഓരോ വിഷയത്തിലും 10 ശതമാനവും മൊത്തത്തില് 35 ശതമാനവും മാര്ക്ക് നേടണം. ഇഡബ്ല്യുഎസ്/ഒബിസി-എന്സിഎല് വിഭാഗക്കാര് യഥാക്രമം 9%, 31.5%, എസ്സി/എസ്ടി/ഭിന്നശേഷി വിഭാഗക്കാര് 5%, 17.5% മാര്ക്ക് കരസ്ഥമാക്കിയാല് മതി. കാറ്റഗറി അടിസ്ഥാനത്തിലുള്ള ഓള് ഇന്ത്യാ റാങ്ക് പട്ടികയും പ്രസിദ്ധീകരിക്കും.
എഎടി 2026: ബി ആര്ക് പ്രവേശനത്തിനുള്ള എഎടി 2026 ജൂണ് 4 ന് രാവിലെ 9-12 മണിവരെ നടത്തും. ജെഇഇ അഡ്വാന്സ്ഡില് യോഗ്യത നേടുന്നവര്ക്കാണ് അവസരം. ഇതിലേക്ക് ജൂണ് 1-2 വരെ https://jeeadv.ac.in- വഴി രജിസ്റ്റര് ചെയ്യാം. പരീക്ഷയുടെ വിവരങ്ങളും അഡ്മിഷന് നടപടികളും ഇന്ഫര്മേഷന് ബുള്ളറ്റിനിലുണ്ട്. എഎടി-ഖരാഗ്പൂ
ര്, റൂര്ക്കി, വാരണാസി എന്നിവിടങ്ങളിലാണ് ബി ആര്ക് കോഴ്സുള്ളത്.
ഐഐടികളിലെ പ്രവേശനം: ജെഇഇ അഡ്വാന്സ്ഡ് 2026 റാങ്കുകാര്ക്ക് ‘ജോസ’ ഓണ്ലൈന് കൗണ്സലിങ് വഴി ഐഐടികളില് പ്രവേശനം നേടാം. ഇതിലേക്കുള്ള അറിയിപ്പ് യഥാസമയം http-s://josaa.nic.in ല് പ്രസിദ്ധപ്പെടുത്തും. ഇന്ത്യയിലെ 23 ഐഐടികളില് വിവിധ ഡിസിപ്ലിനുകളിലായി റഗുലര് ബിടെക്/ബിഎസ്, ഡ്യൂവല് ഡിഗ്രി-ബിടെക് എംടെക്, ബിഎസ്-എംഎസ്, ഇന്റഗ്രേറ്റഡ് എംടെക്, ഇന്റഗ്രേറ്റഡ് ബിഎസ്-എംഎസ്, ഡ്യൂവല് ഡിഗ്രി ബിടെക്-എംബിഎ, ബിഎസ്-എംബിഎ പ്രോഗ്രാമുകളിലേക്കാണ് പ്രവേശനം. ഐഐടി മദ്രാസ്, പാലക്കാട്, തിരുപ്പതി, ഹൈദ്രാബാദ് എന്നിവ ദക്ഷിണ മേഖലയിലാണ്. ഐഐടികളും പ്രോഗ്രാമുകളും അഡ്മിഷന് നടപടിക്രമങ്ങളുമെല്ലാം വെബ്സൈറ്റില് ലഭിക്കും.
ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സ് (ഐഐഎസ്സി) ബെംഗളൂരു, തിരുവനന്തപുരം അടക്കമുള്ള ഏഴ് ഐസറുകള്, തിരുവനന്തപുരം ഇന്ത്യന് ഇന്സ്റ്റിറ്റ്യൂട്ട് ഓഫ് സ്പേസ് സയന്സ് ആന്റ് ടെക്നോളജി (ഐഐഎസ്ടി), ഇന്ത്യന് ഇന്സ്റ്റിറ്റ്യൂട്ട് ഓഫ് പെട്രോളിയം ആന്റ് എനര്ജി വിശാഖപട്ടണം മുതലായ സ്ഥാപനങ്ങളില് ബിടെക്, ബിഎസ് അടക്കമുള്ള അണ്ടര് ഗ്രാഡുവേറ്റ് പ്രോഗ്രാമുകളിലേക്കും ജെഇഇ അഡ്വാന്സ്ഡ് 2026 റാങ്കുകാര്ക്ക് പ്രവേശനം തേടാം.
