വേനല്ച്ചൂട് കാരണം വലയുന്ന കേരളീയരെ ഭീതിയിലാഴ്ത്തി പാമ്പ് കടിയേല്ക്കുന്ന സംഭവങ്ങളും വര്ദ്ധിക്കുന്നു. സൂര്യാതപമേറ്റും പാമ്പ് കടിയേറ്റും മരണവും ഉണ്ടാകുന്നുണ്ട്.
സംസ്ഥാനത്ത് പാമ്പ് കടിയേറ്റ് കഴിഞ്ഞ അഞ്ച് ദിവസത്തിനിടെ അഞ്ച് പേരാണ് മരിച്ചത്. ഈ സാഹചര്യത്തില് പാമ്പ് കടി ഏല്ക്കാതിരിക്കാന് ശ്രദ്ധിക്കേണ്ട കാര്യങ്ങള് എന്തെല്ലാമെന്ന് നോക്കാം.കടിയേറ്റാല് ചെയ്യേണ്ട പ്രഥമശുശ്രൂഷ ,കടിയേറ്റാല് ചെയ്യാന് പാടില്ലാത്ത കാര്യങ്ങള് എന്നതൊക്കെ അറിഞ്ഞിരിക്കുന്നത് നന്ന്.
വീട്ടു പരിസരത്തെ പുല്ലും കാടുകളും വെട്ടിത്തെളിക്കുന്നത് പ്രധാനമാണ്.വിറക്, ചിരട്ട, പഴയ പാത്രങ്ങള് എന്നിവ കൂട്ടിയിടരുത്, രാത്രി പുറത്തിറങ്ങുമ്പോള് വെളിച്ചം ഉപയോഗിക്കണം.
രാത്രി നിലത്ത് കിടന്നുറങ്ങുന്നത് ഒഴിവാക്കുക. ഉറങ്ങുമ്പോള് കട്ടിലോ കൊതുകുവലയോ ഉപയോഗിക്കുക, പറമ്പില് ഇറങ്ങുമ്പോള് കട്ടിയുള്ള പാദരക്ഷകളും നീളമുള്ള പാന്റും ധരിക്കുക. പാമ്പുകള് കടക്കാതിരിക്കാന് വീട്ടിലെ വിടവുകള് അടച്ച് സൂക്ഷിക്കണം. കടിയേറ്റാല് പരിഭ്രമിക്കരുത്. പേടിക്കുമ്പോള് ഹൃദയമിടിപ്പ് വര്ദ്ധിച്ച് വിഷം വേഗത്തില് ശരീരത്തില് പടരാന് കാരണമാകും.
കടിയേറ്റ ഭാഗം ഹൃദയ നിരപ്പിന് താഴെ അനക്കാതെ വയ്ക്കണം. നീരു വരാന് സാധ്യതയുള്ളതിനാല് മോതിരം, ഇറുകിയ വസ്ത്രങ്ങള് എന്നിവ പാടില്ല.കടിയേറ്റാല് ഉടന് ആശുപത്രിയില് എത്തിച്ച് മരുന്ന് നല്കാന് ശ്രദ്ധിക്കണം. കടിച്ച പാമ്പിനെ തിരിച്ചറിയുക എന്നതും പ്രധാനം. സാധിക്കുമെങ്കില് മാറി നിന്ന് കടിച്ച പാമ്പിന്റെ ഒരു ഫോട്ടോ എടുക്കുക. തുടര് ചികിത്സയ്ക്ക് ഇത് സഹായിക്കും. മുറിവിന് മുകളില് തുണിയോ കയറോ കെട്ടരുത്. ഇങ്ങനെ ചെയ്താല് രക്തയോട്ടം കുറഞ്ഞ് കോശങ്ങള് നശിക്കും. മുറിവ് മുറിക്കാനോ വായ് ഉപയോഗിച്ച് വിഷം വലിച്ചെടുക്കാനോ ശ്രമിക്കരുത്. മുറിവില് ഐസ് വയ്ക്കാനോ മന്ത്രവാദം, പച്ചമരുന്ന് പ്രയോഗങ്ങള് തുടങ്ങിയ അശാസ്ത്രീയ രീതികള് പരീക്ഷിക്കുകയോ അരുത്. മദ്യം, കഫീന്, വേദനസംഹാരികള് എന്നിവ കടിയേറ്റ് ആള്ക്ക് നല്കാതിരിക്കാനും ശ്രദ്ധിക്കണം. പാമ്പിനെ കണ്ടാല് ഉടന്തന്നെ വനംവകുപ്പിനെയോ സര്പ്പ വളണ്ടിയര്മാരെയോ അറിയിക്കണം.
