മലപ്പുറം: കോണ്ഗ്രസിലെ മുഖ്യമന്ത്രി ചര്ച്ചയില് മുന്നറിയിപ്പുമായി മുസ്ലിം ലീഗ്. അധികാരം ലഭിക്കുന്നതിന് മുമ്പ് തന്നെ സ്ഥാനമാനങ്ങള്ക്ക് വേണ്ടിയുള്ള കടിപിടികള് യുഡിഎഫിന്റെ രീതിയല്ലെന്ന് മുസ്ലിം ലീഗ് സംസ്ഥാന ജനറല് സെക്രട്ടറി പി എം എ സലാം പറഞ്ഞു.
പരസ്യ പ്രസ്താവനകള് പാര്ട്ടിയുടെ അന്തസിനെ ബാധിക്കുന്നതാണെന്നും പി എം എ സലാം പറഞ്ഞു. ലീഗ് ഈ വിഷയത്തില് ഒരു തവണ അതൃപ്തി പരസ്യമാക്കിയതാണ്. ഇത്തരം പ്രസ്താവനകള് വരാതിരിക്കാന് ഹൈക്കമാന്ഡ് കൂടുതല് ജാഗ്രത പുലര്ത്തണമെന്നും പി എം എ സലാം കൂട്ടിച്ചേര്ത്തു
‘ഇത്തരം ചര്ച്ചകള് അനവസരത്തിലാണ്. ഈ പൊരിവെയിലത്ത് യുഡിഎഫിന്റെ ലക്ഷക്കണക്കിന് പ്രവര്ത്തകര് അധ്വാനിച്ച് ത്യാഗം ചെയ്തിട്ടാണ് വിജയത്തിലേക്ക് എത്തിക്കുന്നത്. അവരുടെ ത്യാഗത്തെ വിസ്മരിച്ച് കൊണ്ട് അധികാരം ലഭിക്കുന്നു എന്ന് ഉറപ്പ് വരുന്നതിന് മുമ്പ് തന്നെ സ്ഥാനമാനങ്ങള്ക്ക് വേണ്ടിയുള്ള കടിപിടി എന്ന് പറയുന്നത് ശരിയാണെങ്കില് അത് യുഡിഎഫിന്റെ രീതിയല്ല, അങ്ങനെ ചെയ്യാന് പാടില്ല. മുസ്ലിം ലീഗിന് അതിന് ശക്തമായ അഭിപ്രായമുണ്ട്. അതൃപ്തി പരസ്യമായി അറിയിച്ചിട്ടുണ്ട്. യുഡിഎഫിന്റെ തീരുമാനങ്ങള് മെയ് നാലിന് ശേഷം ഏകകണ്ഠമായി എടുക്കും. ഇത്തരം ചര്ച്ചകള് വരുന്നത് യുഡിഎഫിന്റെ സല്കീര്ത്തിക്ക് അപമാനകരമാണ്’, പി എം എ സലാം പറഞ്ഞു.
യുഡിഎഫിന്റെ യോഗം ചേര്ന്ന് മുഖ്യമന്ത്രി ലീഗില് നിന്നാകട്ടേ എന്ന് തീരുമാനിച്ചാല് അത് വേണ്ടെന്ന് പറയില്ലെന്നും പി എം എ സലാം കൂട്ടിച്ചേര്ത്തു.
