ന്യൂദല്ഹി: മോദിയുടെ കാന്തവ്യക്തിത്വം എപ്പോഴും ജനക്കൂട്ടത്തെ മാത്രമല്ല, മിടുക്കരായ നേതാക്കളേയും മോദിയിലേക്ക് ആകര്ഷിക്കുന്നു. പല താക്കോല് സ്ഥാനങ്ങളും മോദി ഇന്ന് ഏല്പിച്ചിരിക്കുന്നത് പലപ്പോഴും മറ്റ് പാര്ട്ടികളില് നിന്നും മോദിയാല് ആകൃഷ്ടരായി എത്തിയ ചെറുപ്പക്കാരാണ്. ഇനി അക്കൂട്ടത്തിലേക്ക് ആം ആദ്മിയുടെ മിടുക്കനായ രാഘവ് ഛദ്ദയും എത്തുന്നു.
അസം മുഖ്യമന്ത്രി ഹിമന്ത ബിശ്വശര്മ്മ നേരത്തെ കോണ്ഗ്രസിന്റെ അസം നേതാവായിരുന്നു. പക്ഷെ അവിടെ മക്കള് രാഷ്ട്രീയത്തിന്റെ പേരില് തഴയപ്പെട്ടപ്പോളാണ് മോദിയിലേക്ക് ഹിമന്ത ബിശ്വ ശര്മ്മ എത്തിയത്. മധ്യപ്രദേശിലെ സൂത്രശാലികളായ കോണ്ഗ്രസ് നേതാക്കളായ കമല്നാഥും ദിഗ്വിജയ് സിങ്ങും തഴയുന്നുവെന്ന ബോധ്യം ഉറച്ചതോടെയാണ് മിടുക്കനായ ജ്യോതിരാദ്യ സിന്ധ്യ മോദിയിലേക്കും ബിജെപിയിലേക്കും എത്തിയത്. ഇന്ന് കേന്ദ്ര വാര്ത്താവിനിമയ മന്ത്രിയാണ് ജ്യോതിരാദിത്യ സിന്ധ്യ.
ബംഗാളില് ഇന്ന് മമതയുടെ തൃണമൂല് സാമ്രാജ്യത്തിന്റെ അടിവേരിളക്കുന്ന സുവേന്ദു അധികാരി നേരത്തെ തൃണമൂല് നേതാവായിരുന്നു. പാര്ട്ടിയില് മമത മരുമകന് അഭിഷേക് ബാനര്ജിയെ അധികാരസ്ഥാനത്തേക്ക് കൊണ്ടുവരുമ്പോള് തന്നെ തഴഞ്ഞു എന്ന് മനസ്സിലാക്കിയതോടെയാണ് സുവേന്ദു അധികാരി മോദിയില് ആകൃഷ്ണനായി ബിജെപിയിലേക്ക് എത്തിയത്.
അജിത് പവാര്, അശോക് ചവാന്, നവീന് ജിന്ഡല്, ഗീത കോഡ, തപസ് റോയി….ഈ പട്ടിക നീളുന്നു. അതുപോലെ സിനിമ, ബിസിനസ് മേഖലയില് നിന്നുള്ള പലരും മോദി മൂലം രാഷ്ട്രീയത്തിലേക്ക് വന്നിട്ടുണ്ട്. സുപരിചിതമായ ഉദാഹരണങ്ങളാണ് സുരേഷ് ഗോപിയും രാജീവ് ചന്ദ്രശേഖറും. മുകേഷ് അംബാനി, അദാനി, ആനന്ദ് മഹീന്ദ്ര തുടങ്ങി ബിസിനസ് രംഗത്തുള്ള നിരവധി പേര് മോദിയാല് ആകൃഷ്ടരാണ്.
ഇപ്പോഴിതാ ആം ആദ്മിയുടെ മിടുക്കനായ നേതാവ് രാഘവ് ഛദ്ദയും ബിജെപിയില് എത്തുന്നു. അധികാരം തന്നില് തന്നെ കേന്ദ്രീകരിക്കുന്ന അരവിന്ദ് കെജ്രിവാളിന്റ ശൈലിയോടുള്ള എതിര്പ്പാണ് രാഘവ് ഛദ്ദയെ മോദിയിലേക്ക് അടുപ്പിച്ചത്. പിന്നെ മോദിയുടെ ഒരു ശൈലിയുണ്ട്. മിടക്കുരായ ഒരാളെ കണ്ടാല് അയാളെ തന്നിലേക്കും ബിജെപിയിലേക്കും അടുപ്പിക്കുന്ന ശൈലി. രാഘവ് ഛദ്ദയുടെ കാര്യത്തിലും അത് ഉണ്ടായി. നരേന്ദ്ര മോദിയുടെ ഉറച്ച ദേശീയ നേതൃത്വവും നിശ്ചയദാര്ഡ്യത്തോടുകൂടിയ ഭരണവും ആണ് തന്നെ മോദിയിലേക്ക് അടുപ്പിച്ചതെന്ന് രാഘവ് ഛദ്ദ തന്നെ പറയുന്നു.
എന്താണ് മോദിയുടെ ലക്ഷ്യം
കോണ്ഗ്രസ്, തൃണമൂല്, ആര്ജെഡി, ഡിഎംകെ തുടങ്ങിയ പാര്ട്ടികളെല്ലാം കുടുംബരാഷ്ട്രീയത്തില് കിടന്നു കറങ്ങുമ്പോള് ജെന്സീയേയും ബിസിനസ് മേഖലയിലെ സമര്ത്ഥരേയും മറ്റ് പാര്ട്ടികളിലെ പ്രതിഭാധനരായ നേതാക്കളെയും, മറ്റ് മേഖലകളിലെ അഴിമതിയുടെ കളങ്കമില്ലാത്ത വ്യക്തികളേയും ബിജെപിയിലേക്ക് ആകര്ഷിക്കുകയാണ് മോദി. ഇതിന് പിന്നില് മോദിയ്ക്ക് വ്യക്തമായ ലക്ഷ്യമുണ്ട്. തനിക്ക് ശേഷം അധികാരം തന്റെ മക്കള്ക്ക് എന്നതാണ് കുടുംബരാഷ്ട്രീയപാര്ട്ടികളുടെ ലക്ഷ്യം. കോണ്ഗ്രസും തൃണമൂലും ഡിഎംകെയും ആര്ജെഡിയും എല്ലാം ഈ കുടുംബരാഷ്ട്രീയത്തിന്റെ വക്താക്കളാണ്. എന്നാല് ഇതില് നിന്നും വ്യത്യസ്തമായി, ബിജെപിയെ ഒരു ആധുനിക, പുരോഗമന രാഷ്ട്രീയ ശക്തിയായി വളര്ത്തുകയാണ് മോദിയുടെ ലക്ഷ്യം. ഇത് ബിജെപിയുടെ കുതിപ്പിന് ആക്കം കൂട്ടിയിട്ടുണ്ടെന്നതില് സംശയമില്ല.
