ന്യൂദല്ഹി: ശ്രീബുദ്ധന്റെ വിശുദ്ധ തിരുശേഷിപ്പുകളുടെ പ്രദര്ശനം ലഡാക്കില്. മെയ് ഒന്ന് മുതല് 15 വരെയാണ് പ്രദര്ശനം സംഘടിപ്പിക്കുന്നത്. കേന്ദ്രസാംസ്കാരിക മന്ത്രാലയം ലഡാക്ക് ഭരണകൂടത്തിന്റെയും ഇന്റര്നാഷണല് ബുദ്ധിസ്റ്റ് കോണ്ഫെഡറേഷന്റെയും സഹകരണത്തോടെയാണ് പ്രദര്ശനം സംഘടിപ്പിക്കുന്നത്. പ്രമുഖ ബുദ്ധമതപണ്ഡിതര്, സംന്യാസിമാര്, കേന്ദ്ര-സംസ്ഥാനമന്ത്രിമാര്, വിവിധ സംസ്ഥാനങ്ങളിലെ മുഖ്യമന്ത്രിമാര്, വിവിധ രാജ്യങ്ങളുടെ അംബാസഡര്മാര്, തുടങ്ങിയവര് പരി പാടിയില് പങ്കെടുക്കും.
അനിശ്ചിതത്വവും സംഘര്ഷവും നിറഞ്ഞ ഇന്നത്തെ ആഗോള സാഹചര്യത്തില് ശ്രീബുദ്ധന്റെ ദര്ശന ങ്ങള്ക്ക് പ്രാധാന്യമുണ്ടെന്ന് കേന്ദ്ര സാംസ്കാരിക മന്ത്രി ഗജേന്ദ്ര സിങ് ശെഖാവത്ത് പ്രദര്ശനത്തെക്കുറിച്ച് വിശദീകരിക്കാന് വിളിച്ച വാര്ത്താസമ്മേളനത്തില് അഭിപ്രായപ്പെട്ടു. സമാധാനത്തിന്റെയും ഐക്യത്തിന്റെയും സന്ദേശം പ്രചരിപ്പിക്കുന്നതിനുള്ള ശക്തമായ ഒരു മാധ്യമമായി ഈ പ്രദര്ശനം പ്രവര്ത്തിക്കും. ഭാരതത്തില് ആദ്യമായാണ് ഇത്തരമൊരു പ്രദര്ശനം നടക്കുന്നത്. ബുദ്ധമത പൈതൃക കേന്ദ്രമെന്ന നിലയില് ഈ പ്രദര്ശനം ലഡാക്കിന്റെ സാംസ്കാരിക വിനോദസഞ്ചാരത്തിന് വലിയ ഉത്തേജനം നല്കുമെന്നും കേന്ദ്രമന്ത്രി കൂട്ടിച്ചേര്ത്തു.
ലഡാക്ക് ലഫ്. ഗവര്ണര് വി.കെ. സക്സേന, സാംസ്കാരിക വകുപ്പ് ജോ. സെക്രട്ടറി സമര് നന്ദ, മീനാക്ഷി ജോളി, ഇന്റര്നാഷണല് ബുദ്ധിസ്റ്റ് കോണ്ഫെഡറേഷന് ഡയറക്ടര് ജനറല് അഭിജിത്ത് ഹല്ദെര്, പിഐബി എഡിജി അണ്ണാദുരൈ എന്നിവര് വാര്ത്താസമ്മേളനത്തില് പങ്കെടുത്തു. കൂടുതല് വിവരങ്ങള്ക്ക് https://tathagata.co.in/ സന്ദര്ശിക്കാം.
