കല്ലട: തകര്ന്നുകിടന്ന കേരളത്തിലെ ക്ഷേത്രങ്ങള് ഉയര്ത്തെഴുന്നേറ്റതിന് പിന്നില് ഹിന്ദുക്കളുടെ ഇച്ഛാശക്തി കാണാനാകുമെന്ന് ഹിന്ദു ഐക്യവേദി രക്ഷാധികാരി കെ.പി. ശശികല ടീച്ചര്. കല്ലട പുതിയിടത്ത് ശ്രീ പാര്വതി ക്ഷേത്രത്തില് അപര്ണോത്സവം -2026 പരിപാടിയില് സംസാരിക്കുകയായിരുന്നു അവര്.
ഇച്ഛാശക്തിക്കൊപ്പം ജ്ഞാനശക്തിയും ക്രിയാശക്തിയും ഉണ്ടാകണം. ഇങ്ങനെ വരുമ്പോള് ക്ഷേത്രങ്ങള് ഉയരുകയും ഗ്രാമം ഉയരുകയും ചെയ്യും. ക്ഷേത്രങ്ങള് ഗ്രാമത്തിന്റെ പുരോഗതിക്കുള്ള കേന്ദ്രമായി മാറണം. പരിസ്ഥിതി സംരക്ഷണം ക്ഷേത്രത്തില് നടക്കണം. ഗ്രാമത്തിലെ മുഴുവന് ജനങ്ങളെയും ഒന്നായി ചേര്ക്കാന് കഴിയുന്ന കേന്ദ്രമായി ക്ഷേത്രം മാറണം. ക്ഷേത്രങ്ങളില് സമൂഹാരാധനയും മതപാഠശാലയും ഉണ്ടാകണം. ക്ഷേത്ര സ്വത്തായിരുന്ന പാടങ്ങള് ഇന്ന് ഇല്ലാതായിരിക്കുന്നു. അതുമൂലം നാട്ടിലെ കൃഷി നശിച്ചു. ക്ഷേത്രങ്ങള് വെറും പ്രാര്ത്ഥനാലയം അല്ല നമ്മുടെ നിത്യജീവിതത്തിന്റെ ഭാഗമായിരുന്നുവെന്നും അവര് പറഞ്ഞു.
നാലാംദിവസമായ ഇന്ന് രാവിലെ 7.30മുതല് ചണ്ഡികായാഗം, വൈകിട്ട് 6.30ന് അഷ്ടവിധാനസേവയും മഹാആരതിയും. 7ന് കൊല്ലം ശക്തിപാദ അദ്വൈതാശ്രമം സ്വാമിനി ദിവ്യാനന്ദപുരിയുടെ ആദ്ധ്യാത്മികപ്രഭാഷണം.
