ന്യൂദല്‍ഹി: ഭരണഘടനയിലെ ധാര്‍മികതയും നിര്‍ദേശക തത്വങ്ങളും ഉദ്ധരിച്ച്, മതങ്ങളിലെ സാമൂഹ്യ പരിഷ്‌കരണ നിയമങ്ങളെ ന്യായീകരിക്കാന്‍ സര്‍ക്കാരുകള്‍ക്ക് സാധിക്കുമോയെന്ന് സുപ്രീംകോടതി. ശബരിമലയിലെ യുവതി പ്രവേശനഹര്‍ജി പരിഗണിക്കവേ ഒന്‍പതംഗ ഭരണഘടനാ ബെഞ്ചാണ് ഈ ചോദ്യം ഉന്നയിച്ചത്. ഭരണഘടനയുടെ 25 (രണ്ട് ബി) വകുപ്പ് പ്രകാരം സര്‍ക്കാരിനുള്ള ചില അധികാരങ്ങള്‍ സംബന്ധിച്ച ഈ ചോദ്യം ഉന്നയിച്ചത് ജസ്റ്റിസ്ജോയ് മല്ല്യ ബാഗ്ചിയാണ്.
പരിഷ്‌കരണം സാമൂഹ്യ ക്ഷേമം എന്നിവ മുന്‍നിര്‍ത്തി, മതകാര്യങ്ങളില്‍ നിയമമുണ്ടാക്കാനും പൊതു സ്വഭാവമുള്ള ഹിന്ദു മതസ്ഥാപനങ്ങള്‍ എല്ലാവര്‍ക്കുമായി തുറന്നു കൊടുക്കാനും സര്‍ക്കാരിന് അധികാരം നല്‍കുന്നതാണ് ഈ വകുപ്പ്. ഭരണഘടനാപരമായ ധാര്‍മികത, ഭരണഘടനയിലെ നിര്‍ദേശക തത്വങ്ങള്‍ എന്നിവ ഉയര്‍ത്തിപ്പിടിച്ച്, ഈ വകുപ്പ് ഉപയോഗിച്ച്, മതങ്ങള്‍ക്കു മേല്‍ നിയമം കൊണ്ടുവരാന്‍ സര്‍ക്കാരിന് സാധിക്കുമോ? സാമൂഹ്യ പരിഷ്‌ക്കരണം, സാമൂഹ്യക്ഷേമം എന്നൊക്കെ പറയുന്നത് എന്താണ്? ഇവയുടെ മറവില്‍ സര്‍ക്കാരുകള്‍ക്ക് മതങ്ങള്‍ക്കുമേല്‍ നിയമം കൊണ്ടുവരാന്‍ സാധിക്കുമോ? അദ്ദേഹം ആരാഞ്ഞു.
സര്‍ക്കാരിന്റെ ഭരണഘടനാപരമായ അവകാശങ്ങള്‍ സുപ്രധാനമാണെങ്കിലും മതസ്വാതന്ത്ര്യവും നിര്‍ണായകമാണെന്ന് മുതിര്‍ന്ന അഭിഭാഷകന്‍ ഗോപാല്‍ സുബ്രഹ്‌മണ്യന്‍ പ്രതികരിച്ചു. ഭരണഘടനയുടെ 25 ാം വകുപ്പ് ഉപയോഗിച്ചുള്ള നിയമ
നിര്‍മാണത്തില്‍ വളരെ ശ്രദ്ധിക്കണം. സാമൂഹ്യ പരിഷ്‌ക്കരണത്തിനുള്ള ആവശ്യകതയും അതിന്റെ ലക്ഷ്യവും തമ്മില്‍ വ്യക്തമായ ബന്ധം വേണം. അല്ലെങ്കില്‍ ഈ വകുപ്പ് ഉപയോഗിച്ചുള്ള നിയമനിര്‍മാണം ക്രമേണ മതസ്വാതന്ത്ര്യം നശിപ്പിക്കും. സുപ്രധാനമല്ലാത്ത മതാചാരങ്ങളെ പോലും ബഹുമാനിക്കണം, മതാചാരങ്ങളും ശീലങ്ങളും വെറുതേ തള്ളാനാവില്ല. അവ അവശ്യമല്ലെങ്കില്‍ പോലും പാരമ്പര്യത്തിന്റെ ഭാഗമാണെങ്കില്‍ ബഹുമാനിക്കണം, അദ്ദേഹം പറഞ്ഞു.
ആരുടെയും വ്യക്തി സ്വാതന്ത്ര്യത്തില്‍ കടന്നു കയറരുതെന്നും ഭരണഘടനയുടെ പേരില്‍, മതാവകാശങ്ങള്‍ നിയന്ത്രിക്കരുതെന്നും വിവിധ സംഘടനകള്‍ക്കു വേണ്ടി ഹാജരായ അഭിഭാഷകര്‍ ആവശ്യപ്പെട്ടു.
