മുംബൈ: ഇംഗ്ലണ്ടിന്റെ ഓള്‍ റൗണ്ടര്‍ വില്‍ ജാക്‌സ് ഐപിഎല്ലിലേക്ക് മടങ്ങിയെത്തുന്നു. മുംബൈ ഇന്ത്യന്‍സ് താരമായ വില്‍ ജാക്‌സ് ചെന്നൈ സൂപ്പര്‍ കിങ്‌സിനെതിരായ മത്സരത്തിന് മുമ്പ് ടീമിലെത്തും. വ്യക്തിപരമായ കാരണങ്ങളാല്‍ ജാക്‌സ് ടീമിലുണ്ടായിരുന്നില്ല. കഴിഞ്ഞ തവണ മുംബൈ നിരയില്‍ കളിച്ച വില്‍ ജാക്‌സിനെ 5.25 കോടിയ്‌ക്കാണ് മുംബൈ നിലനിര്‍ത്തിയത്. എന്നാല്‍ ആദ്യ ആറ് മത്സരത്തിലും താരം കളിച്ചിരുന്നില്ല.
ടി20 ലോകകപ്പില്‍ ഇംഗ്ലണ്ടിനായി മികച്ച പ്രകടനം പുറത്തെടുത്ത താരമാണ് വില്‍ ജാക്‌സ്. നാല് മത്സരങ്ങളില്‍ താരം പ്ലെയര്‍ ഓഫ് ദി മാച്ചായിരുന്നു. 226 റണ്‍സും 9 വിക്കറ്റുകളും താരം ലോകകപ്പില്‍ നേടി. ഇംഗ്ലണ്ടിനെ സെമിയിലെത്തിക്കുന്നതിലും താരം നിര്‍ണായകമായി. ലോകകപ്പിനു ശേഷം താരം വിശ്രമത്തിലായിരുന്നു.
കഴിഞ്ഞ സീസണില്‍ മുംബൈക്കായി 13 മത്സരങ്ങളാണ് വില്‍ ജാക്‌സ് കളിച്ചത്. 233 റണ്‍സും ആറ് വിക്കറ്റും നേടിയിരുന്നു. ലേലത്തിനു മുന്‍പ് താരത്തെ നിലനിര്‍ത്തുകയായിരുന്നു. തുടര്‍ച്ചയായ മൂന്നു മത്സരങ്ങളില്‍ പരാജയപ്പെട്ട ശേഷം മുംബൈ കഴിഞ്ഞ ദിവസം വിജയിച്ചു. ഗജറാത്ത് ടൈറ്റന്‍സിനെതിരേ 99 റണ്‍സിന്റെ ജയമാണ് മുംബൈ സ്വന്തമാക്കിയത്.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ മുംബൈ 20 ഓവറില്‍ അഞ്ച് വിക്കറ്റ് നഷ്ടത്തില്‍ 199 റണ്‍സ് നേടിയപ്പോള്‍ ഗുജറാത്തിന് 15.5 ഓവറില്‍ മുഴുവന്‍ വിക്കറ്റ് നഷ്ടത്തില്‍ 100 റണ്‍സ് മാത്രമേ നേടാനായുള്ളൂ. മുംബൈക്കായി തിലക് വര്‍മ സെഞ്ചുറി നേടി മാന്‍ ഓഫ് ദ മാച്ചായി.
