ന്യൂദല്‍ഹി: തപാല്‍ വകുപ്പ് 2025-26 സാമ്പത്തികവര്‍ഷത്തില്‍ 15,296 കോടി രൂപയുടെ വരുമാനം നേടിയതായി കേന്ദ്രവാര്‍ത്താവിനിമയ മന്ത്രി ജ്യോതിരാദിത്യ സിന്ധ്യ അറിയിച്ചു. കഴിഞ്ഞ സാമ്പത്തിക വര്‍ഷത്തെ പ്രവര്‍ത്തനങ്ങള്‍ അവലോകനം ചെയ്യാനും 2026-27 സാമ്പത്തിക വര്‍ഷത്തെ പ്രവര്‍ത്തനങ്ങള്‍ ത്വരിതപ്പെടുത്താനുമായി ന്യൂദല്‍ഹിയില്‍ ചേര്‍ന്ന വാര്‍ഷിക ബിസിനസ് മീറ്റില്‍ സംസാരിക്കുകയായിരുന്നു അദ്ദേഹം.
2024-25ല്‍ 13,218 കോടി രൂപയായിരുന്നു വരുമാനം. ഇത്തവണ 16 ശതമാനം വളര്‍ച്ച നേടി. 17,546 കോടിയാണ് വകുപ്പ് ലക്ഷ്യമിട്ടിരുന്നത്, ലക്ഷ്യത്തിന്റെ 88% കൈവരി ക്കാനായി. രാജ്യത്താകമാനമുള്ള 23 സര്‍ക്കിളുകളില്‍ എട്ട് സര്‍ക്കിളുകള്‍ ലക്ഷ്യത്തിന്റെ 90%ത്തിലധികവും 14 സര്‍ക്കിളുകള്‍ 80 മുതല്‍ 90% വരെയും നേട്ടം കൈവരിച്ചതായും മന്ത്രി അറിയിച്ചു.
പാഴ്സലുകള്‍, മെയില്‍, ഇന്റര്‍നാഷണല്‍ ബിസിനസ് തുടങ്ങിയ പ്രധാന വിഭാഗങ്ങളുടെ വളര്‍ച്ചാ സാധ്യതകള്‍ കൂടുതല്‍ ഉപയോഗപ്പെടുത്തണമെന്ന് മന്ത്രി പറഞ്ഞു.
ആധുനികവും സംയോജിതവും ഉപഭോക്തൃ കേന്ദ്രീകൃതവുമായ സേവനസ്ഥാപനമായി ഇന്ത്യാ പോസ്റ്റിന്റെ പരിവര്‍ത്തനത്തെ പിന്തുണയ്‌ക്കുന്നതിന് ശക്തമായ വരുമാനസ്രോതസായി പാഴ്സലുകളും മെയിലും ഉയര്‍ന്നുവരണം. മുഴുവന്‍ തപാല്‍ ജീവനക്കാരുടെയും കൂട്ടായ പരിശ്രമത്തെയും വകുപ്പിന്റെ വികസിച്ചുകൊണ്ടിരിക്കുന്ന പ്രവര്‍ത്തന സമീപനത്തെയും പ്രതിഫലിപ്പിക്കുന്നതാണ് ഈ പ്രകടനം. പ്രധാനമന്ത്രി നരേന്ദ്ര മോദിയുടെ ദര്‍ശനത്തിന് കീഴില്‍ രാജ്യമെമ്പാടുമുള്ള പൗരന്മാരുടെ അഭിലാഷങ്ങള്‍ നിറവേറ്റുന്നതിന് പ്രതിജ്ഞാബദ്ധമായ, ഭാവിയിലേക്ക് സജ്ജമായ, പാരമ്പര്യത്തില്‍ വേരൂന്നിയ, മൂല്യാധിഷ്ഠിത, സേവനാധിഷ്ഠിത സ്ഥാപനമായി തപാല്‍ വകുപ്പ് മാറുകയാണെന്ന് ജ്യോതിരാദിത്യ കൂട്ടിച്ചേര്‍ത്തു.
പാഴ്സലുകള്‍ 69%വും മെയില്‍ പ്രവര്‍ത്തനങ്ങള്‍ 34%വും പോസ്റ്റ് ഓഫീസ് സേവിംഗ്സ് ബാങ്ക് 13%വും വളര്‍ച്ച കൈവരിച്ചു. മൊത്തത്തിലുള്ള പ്രകടനത്തില്‍ രാജസ്ഥാന്‍ സര്‍ക്കിളാണ് ഏറ്റവും മികച്ച പ്രകടനം കാഴ്ചവച്ചത്. മൊത്തം വരുമാന ലക്ഷ്യത്തിന്റെ 102% കൈവരിക്കുകയും മുന്‍വര്‍ഷത്തെ അപേക്ഷിച്ച് 34% വളര്‍ച്ച കൈവരിക്കുകയും ചെയ്തു. മികച്ച പ്രകടനം കാഴ്ചവെച്ച സര്‍ക്കിളുകള്‍ക്കുള്ള ഉപഹാരങ്ങളും മന്ത്രി സമ്മാനിച്ചു. വകുപ്പ് സെക്രട്ടറി വന്ദിത കൗള്‍, പോസ്റ്റല്‍ സര്‍വീസസ് ഡയറക്ടര്‍ ജനറല്‍ ജിതേന്ദ്ര ഗുപ്ത എന്നിവരും തപാല്‍ ഡയറക്ടറേറ്റിലെ മുതിര്‍ന്ന ഉദ്യോഗസ്ഥരും 23 പോസ്റ്റല്‍ സര്‍ക്കിളുകളില്‍ നിന്നുള്ള ചീഫ് പോസ്റ്റ്മാസ്റ്റേഴ്സ് ജനറല്‍മാരും യോഗത്തില്‍ പങ്കെടുത്തു.
