തിരുവനന്തപുരം: തിരുവനന്തപുരത്ത് സദാചാര പൊലീസ് ചമഞ്ഞ് യുവാവിനെയും യുവതിയെയും ആക്രമിച്ച കേസിലെ പ്രതിയായ കുപ്രസിദ്ധ കുറ്റവാളി തമ്പുരു വിഷ്ണു എംഡിഎംയുമായി പിടിയില്. കഠിനംകുളം മുണ്ടന്ചിറ സ്വദേശിയാണ് ഇയാള്. സദാചാര പൊലീസ് ചമഞ്ഞ് യുവതീ യുവാക്കളെ മര്ദ്ദിച്ച കേസില് ഇയാള് ജാമ്യത്തിലിറങ്ങിയിരുന്നു.
തിരുവനന്തപുരം റൂറല് ഡാന്സാഫ് സംഘമാണ് പ്രതിയെ പിടികൂടിയത്. കാപ്പ നിയമ പ്രകാരം കരുതല് തടങ്കല് കഴിഞ്ഞ് പുറത്തിറങ്ങി മൂന്ന് മാസത്തിനിടെ നിരവധി കേസുകളാണ് ഇയാളുടെ പേരില് രജിസ്റ്റര് ചെയ്തിട്ടുള്ളത്.
റിമാന്ഡിലായിരുന്ന പ്രതി ജാമ്യത്തിലിറങ്ങിയ ശേഷം എംഡിഎംഎ കച്ചവടം നടത്തുകയായിരുന്നു. ഡാന്സാഫിന് ലഭിച്ച വിവരത്തെ തുടര്ന്ന് നടത്തിയ പരിശോധനയിലാണ് പിടിയിലായത്.
വിഷ്ണുവില് നിന്ന് 2.2ഗ്രാം എംഡിഎംഎ കണ്ടെടുത്തു. വധശ്രമവും പൊലീസിനെ ആക്രമിച്ചതും ഉള്പ്പെടെ നിരവധി കേസുകളില് പ്രതിയാണ് തമ്പുരു വിഷ്ണു. കോടതിയില് ഹാജരാക്കി പ്രതിയെ റിമാന്ഡ് ചെയ്തു.
