ആലുവ: രാഷ്ട്ര സേവികാ സമിതി കേരളം പ്രാന്തത്തിന്റെ പ്രഥമ ശിക്ഷാവര്ഗിന് ആലുവയില് തുടക്കം. കടുങ്ങല്ലൂര് രുഗ്മിണി സ്മൃതി ട്രസ്റ്റില് നടക്കുന്ന പ്രഥമ ശിക്ഷാവര്ഗ് ആസ്റ്റര് മെഡിസിറ്റിയിലെ പ്രമുഖ ഓങ്കോളജിസ്റ്റ് ഡോ. ദുര്ഗ പൂര്ണ ഉദ്ഘാടനം ചെയ്തു.
പ്രാന്ത കാര്യാലയ പ്രമുഖ ലക്ഷ്മി മുരളി അധ്യക്ഷത വഹിച്ചു. രാഷ്ട്ര സേവികാ സമിതി അഖില ഭാരതീയ സഹകാര്യ വാഹിക അല്ക്ക ഇനേംദാര് മുഖ്യപ്രഭാഷണം നടത്തി. ആത്മവിസ്മൃതിയില് ആണ്ടുപോയ ഭാരതീയ സ്ത്രീകളെ ഏകോപിപ്പിക്കുന്നതിന് സേവികാസമിതിയുടെ പങ്ക് മഹത്തരമാണെന്ന് അല്ക്ക ഇനേംദാര് പറഞ്ഞു.
നവതിയുടെ നിറവിലാണ് സംഘടന. സേവികാ സമിതിയുടെ രൂപീകരണവും രാഷ്ട്രത്തിന്റെ പുനര്നിര്മാണ പ്രക്രിയയില് സ്ത്രീകള് വഹിക്കേണ്ട പങ്കിന്റെ പ്രാധാന്യത്തെ പറ്റിയും അവര് എടുത്തുപറഞ്ഞു. സ്ത്രീകള് അബലകളല്ല മറിച്ച് സുബലകള് ആണെന്നും, മാതൃഭാവത്തിലൂടെ ഓരോ വ്യക്തിയുടെയും വ്യക്തിത്വം രാഷ്ട്ര പുനര്നിര്മാണത്തിനായി വികസിപ്പിച്ചെടുക്കേണ്ടതാണെന്നും അല്ക്ക ദീദി പ്രഭാഷണത്തില് പറഞ്ഞു. പ്രാന്തകാര്യവാഹിക അഡ്വ. ശ്രീകല സ്വാഗതം പറഞ്ഞു.
കേരളത്തിലെ വിവിധ ജില്ലകളില് നിന്നായി ശിക്ഷാര്ത്ഥികളും പ്രാന്ത- ജില്ലാ കാര്യകര്ത്താക്കളും ഉദ്ഘാടന സഭയില് പങ്കെടുത്തു. പതിനഞ്ച് ദിവസം നീണ്ട്നില്ക്കുന്ന പ്രവേശ് വര്ഗ് മെയ് 3ന് സമാപിക്കും.
