പത്തനംതിട്ട: പശ്ചിമേഷ്യന് യുദ്ധം, ടാര് അടക്കമുള്ള അവശ്യസാധനങ്ങളുടെ വില വര്ദ്ധനവ്, അത്യുഷ്ണം, ടെന്ഡര് നടപടിയിലെ കാലതാമസം എന്നിവ നിര്മ്മാണ മേഖലയെ പ്രതിസന്ധിയിലാക്കുന്നു.
പത്തനംതിട്ട, കോട്ടയം, ആലപ്പുഴ, കൊല്ലം ജില്ലകളിലായി വ്യാപിച്ചു കിടക്കുന്ന 800ല് പരം കിലോ മീറ്റര് ദൈര്ഘ്യം വരുന്ന വിവിധ ശബരിമല റോഡുകളുടെ ടെന്ഡര് നടപടി ആരംഭിക്കേണ്ട സമയമാണിത്. എന്നാല് സര്ക്കാര് തലത്തില് യാതൊരു നടപടിയും ആരംഭിച്ചിട്ടില്ല. തെരഞ്ഞെടുപ്പ് ഫലം അറിഞ്ഞ് പുതിയ സര്ക്കാര് അധികാരത്തില് വന്നശേഷം കാര്യങ്ങള് പുരോഗമിക്കണമെങ്കില് ജൂണ് പകുതിയെങ്കിലും ആകും. തൂക്കുമന്ത്രിസഭ ആണെങ്കില് കാര്യങ്ങള് പിന്നെയും നീളും. അപ്പോഴേക്കും ഇടവപ്പാതി ശക്തമാകും. ഇപ്പോഴത്തെ നിലയില് ടെന്ഡര് പൂര്ത്തീകരിച്ച് നിര്മാണം ആരംഭിക്കാന് ഒക്ടോബര് വരെ കാത്തിരിക്കേണ്ട അവസ്ഥയാണ്. ശബരിമല സീസണ് ആരംഭിക്കാന് പിന്നെ ശേഷിക്കുന്നത് ഒന്നര മാസം മാത്രം. അതിനുള്ളില് പണികള് കാര്യക്ഷമമായി നടത്താനും കഴിയില്ല. പശ്ചിമേഷ്യന് യുദ്ധം മൂലം പൊതുമേഖലാ സ്ഥാപനങ്ങള് തന്നെ ടാറിന്റെ വില ഗണ്യമായി വര്ധിപ്പിച്ചിരിക്കുകയാണ്. ടൈലുകള്, ഇലക്ട്രിക്കല് ഉപകരണങ്ങള് തുടങ്ങിയവയുടെ വിലയും കൂടി. വില വ്യത്യാസം കരാറുകാര്ക്ക് ലഭ്യമാക്കണം. പ്രീ-മണ്സൂണ് ജോലികള് മുടങ്ങുന്നത് മഴക്കാലത്ത് യാത്ര ദുസഹമാക്കും. മെയ് കഴിഞ്ഞാല് ടാറിങ് ജോലികള് പ്രായോഗികമല്ല.
സ്വദേശത്തേക്ക് മടങ്ങിയ തൊഴിലാളികള് മെയ് അവസാനത്തോടെയേ മടങ്ങിയെത്തൂ. അത്യുഷ്ണം മൂലം സംസ്ഥാനത്തുള്ളവരും ജോലി ചെയ്യാനാവാത്ത സ്ഥിതിയിലാണ്. മണ്സൂണ് തുടങ്ങുംവരെ ജോലി സമയം പുനഃക്രമീകരിക്കണം എന്ന ആവശ്യവും ശക്തമാണ്.
തെരഞ്ഞെടുപ്പ് ഫലം വരുംമുമ്പേ ചീഫ് സെക്രട്ടറി യോഗം വിളിക്കണമെന്ന് കേരളാ ഗവണ്മെന്റ് കോണ്ട്രാക്ടേഴ്സ് അസോസിയേഷന് പ്രസിഡന്റ് വര്ഗീസ് കണ്ണമ്പള്ളി ആവശ്യപ്പെട്ടു. ഇത് സംബന്ധിച്ച് അസോസിയേഷന് ചീഫ് സെക്രട്ടറിക്ക് നിവേദനം നല്കി. ഫലത്തില് കേരളം അപ്രഖ്യാപിത നിര്മാണ ബന്ദിലാണെന്ന് കണ്ണമ്പള്ളി പറഞ്ഞു. തെരഞ്ഞെടുപ്പ് പെരുമാറ്റ ചട്ടത്തിന്റെ പേരുപറഞ്ഞ് ബന്ധപ്പെട്ട ചീഫ് എഞ്ചിനീയര്മാരും വകുപ്പ് മേധാവികളും നിഷ്ക്രിയരാണ്. ഈ സാഹചര്യത്തില് ചീഫ് സെക്രട്ടറി അടിയന്തരമായി ഇടപെടണമെന്ന ആവശ്യം ശക്തമാണ്.
