ഡര്‍ബന്‍: ദക്ഷിണാഫ്രിക്കന്‍ പര്യടനത്തിനെത്തിയ ഭാരത വനിതകള്‍ക്ക് ആദ്യ മത്സരത്തില്‍ തിരിച്ചടി. അഞ്ച് മത്സര ട്വന്റി20 പരമ്പരയ്‌ക്കായെത്തിയ ഹര്‍മന്‍പ്രീത് കൗറും കൂട്ടരും ആദ്യ മത്സരം ആതിഥേയര്‍ക്ക് മുന്നില്‍ അടിയറ വച്ചത് ആറ് വിക്കറ്റിന്.
മത്സരത്തില്‍ ആദ്യം ബാറ്റ് ചെയ്ത ഭാരതം 20 ഓവറില്‍ ഏഴ് വിക്കറ്റ് നഷ്ടത്തില്‍ 157 റണ്‍സെടുത്തു. മറുപടി ബാറ്റിങ്ങില്‍ ദക്ഷിണാഫ്രിക്ക 19.1 ഓവറില്‍ നാല് വിക്കറ്റ് നഷ്ടപ്പെടുത്തി ലക്ഷ്യത്തില്‍(158) എത്തിച്ചേര്‍ന്നു.
തുടക്കത്തിലെ തകര്‍പ്പന്‍ ബാറ്റിങ്ങിന് ശേഷം ഒരു ഘട്ടം കഴിഞ്ഞപ്പോള്‍ ഭാരത ഇന്നിങ്‌സ് മന്ദഗതിയിലായി. അഞ്ചാം ഓവറിന്റെ അവസാന പന്തില്‍ ആദ്യ വിക്കറ്റ് നഷ്ടപ്പെടുമ്പോള്‍ 46 റണ്‍സുണ്ടായിരുന്നു. ഷഫാലി വര്‍മ(34)യാണ് പുറത്തായത്. തൊട്ടടുത്ത ഓവറില്‍ സ്മൃതി മന്ദനയും(13) പുറത്തായതോടെ ഭാരത റണ്‍നിരക്ക് താഴാന്‍ തുടങ്ങി. പിന്നീട് ജെമീമ റോഡ്രിഗസ്(36) പുറത്താകും വരെ വലിയ പ്രശ്‌നമില്ലായിരുന്നു. 14.2 ഓവറില്‍ ജെമീമയുടെ പുറത്താകലിന് ശേഷം ഭാരത വിക്കറ്റുകള്‍ അതിവേഗം വീഴാന്‍ തുടങ്ങി. ഒരുവശത്ത് വിക്കറ്റ് കാത്തുകൊണ്ട് ക്യാപ്റ്റന്‍ ഹര്‍മന്‍പ്രീത്(പുറത്താകാതെ 47) പൊരുതിയെങ്കിലും ഡെത്ത് ഓവറുകളില്‍ വേണ്ടത്ര റണ്‍നിരക്ക് ഉയര്‍ത്താന്‍ സാധിച്ചില്ല. ദക്ഷിണാഫ്രിക്കയ്‌ക്കായി അയബോംഗ ഖാക്ക മൂന്ന് വിക്കറ്റുകള്‍ നേടി. നാല് ഓവറില്‍ 16 റണ്‍സ് മാത്രം വഴങ്ങിക്കൊണ്ടുള്ള ഖാക്കയുടെ പ്രകടനമാണ് മത്സരത്തിന്റെ ഗതി നിര്‍ണയിച്ചത്.
മറുപടി ബാറ്റിങ്ങില്‍ ദക്ഷിണാഫ്രിക്ക വലിയ ആശങ്കകളില്ലാതെ ലക്ഷ്യത്തിലെത്തിച്ചേര്‍ന്നു. ക്യാപ്റ്റന്‍ ലോറ വോള്‍വാര്‍ഡ്റ്റ്(51) നേടിയ അര്‍ദ്ധ സെഞ്ചുറിയോടെ നല്‍കിയ തുടക്കം ഏറ്റെടുത്ത് അന്നെറീ ഡെര്‍ക്ക്‌സെനും (44) ക്ലോ ട്രയോണും(18) ചേര്‍ന്ന് ടീമിനെ വിജയതീരത്തെത്തിച്ചു.
