മിലാന്: ഇറ്റാലിയന് സീരി എയില് ഇന്റര് മിലാന് 21-ാം കിരീട നേട്ടത്തിലേക്ക് ഒരു ചുവടുകൂടി അടുത്തു. സ്വന്തം സ്റ്റേഡിയം സാന്സിറോയില് നടന്ന പോരാട്ടത്തില് കാഗ്ലിയാരിയെ 3-0ന് തോല്പ്പിച്ചു. ഇതോടെ 33 മത്സരങ്ങളില് നിന്ന് ഇന്ററിന് 78 പോയിന്റായി.
25 വിജയവും മൂന്ന് സമനിലയും സഹിതമാണ് ഇന്റര് ഇത്രയും പോയിന്റുകള് നേടിയത്. കാഗ്ലിയാരിക്കെതിരായ മത്സരം ജയിക്കുന്ന സമയത്ത് തൊട്ടുതാഴെയുള്ള നാപ്പോളിയെക്കാള് 12 പോയിന്റ് മുന്നിലാണ് ഇന്റര്.
കാഗ്ലിയാരിക്കെതിരായ മത്സരത്തില് രണ്ടാം പകുതിയിലാണ് ഇന്റര് മൂന്ന് ഗോളുകളും നേടിയത്. 52-ാം മിനിറ്റില് മാര്കസ് തുറാം ആദ്യ ഗോള് കണ്ടെത്തി. നാല് മിനിറ്റിനകം നിക്കോളോ ബറേല്ല സ്കോര് ചെയ്തു. മത്സരം അവസാനത്തോടടുക്കുമ്പോള് പരിക്ക് സമയത്ത് പിയോറ്റര് സിയെലിന്സ്കിയും ഇന്ററിനായി ഗോള് നേടി.
ലീഗിലെ മറ്റൊരു മത്സരത്തില് കോമോയെ സാസ്സ്യൂളോ തോല്പ്പിച്ചു. ഒന്നിനെതിരെ രണ്ട് ഗോളുകള്ക്കായിരുന്നു വിജയം. തോല്വിയോടെ ആദ്യ നാലില് ഇടിച്ചുകയറാവുന്ന അവസരമാണ് കോമോ പാഴാക്കിയത്.
