ധുരന്ധർ ബ്രഹ്മാണ്ഡഹിറ്റായതിനു പിന്നാലെ 119 കോടി രൂപയുടെ അത്യാഡംബര വസതി സ്വന്തമാക്കി രൺവീറും ദീപികയും . മുംബൈ നഗരത്തിന്റെ ഹൃദയഭാഗത്ത്, നാഗ്പാൽ ഡെവലപ്പേഴ്‌സ് നിർമിച്ച സാഗർ രേഷാം ഹൗസിങ് സൊസൈറ്റിയിലെ 16 മുതൽ 19 വരെയുള്ള നാല് നിലകളിലായാണ് വീട് ഒരുങ്ങുന്നത്.
ഏകദേശം 11,266 ചതുരശ്ര അടിയിലാണ് ഈ വീട് ഒരുക്കിയിരിക്കുന്നത്. അറേബ്യൻ കടലിന്റെ പനോരമിക് കാഴ്ച ആസ്വദിക്കാൻ സാധിക്കുന്ന 1,300 ചതുരശ്ര അടിയുടെ വിശാലമായ ടെറസ് ഈ വീടിന്റെ പ്രധാന ആകർഷണമാണ്. 2024-ൽ ഇതേ കെട്ടിടത്തിന്റെ 15-ാം നിലയിൽ 17.8 കോടി രൂപയ്‌ക്ക് ദീപിക പദുക്കോൺ മറ്റൊരു അപ്പാർട്മെന്റ് കൂടി വാങ്ങിയിരുന്നു.ഷാറുഖ് ഖാന്റെ ‘മന്നത്തിനും’ സൽമാൻ ഖാന്റെ ‘ഗാലക്സി അപ്പാർട്മെന്റിനും’ തൊട്ടടുത്താണ് ഈ പുതിയ വസതി. സിനിമ താരങ്ങളുടെയും ബിസിനസ് പ്രമുഖരുടെയും പ്രിയപ്പെട്ട ഇടമാണ് ബാന്ദ്ര.
ബാന്ദ്രയിലെ ഈ പുതിയ വസതിക്ക് പുറമെ, മറ്റ് പല പ്രോപ്പർട്ടികളും രൺവീർ–ദീപിക ജോഡികൾക്കുണ്ട്. മുംബൈയിലെ പ്രഭാദേവിയിലുള്ള ബ്യൂമോണ്ടെ ടവേഴ്‌സിൽ ദീപികയ്‌ക്ക് സ്വന്തമായി ഫ്ലാറ്റുണ്ട്. കൂടാതെ, ഇതേ കെട്ടിടത്തിൽ തന്നെ മറ്റൊരു അപ്പാർട്മെന്റ് കൂടി ഇവർ ലീസിന് എടുത്തിട്ടുണ്ട്. 2021-ൽ അലിബാഗിൽ ഏകദേശം 22 കോടി രൂപ വിലമതിക്കുന്ന 5 ബിഎച്ച്കെ ആഡംബര ബംഗ്ലാവ് ഇവർ സ്വന്തമാക്കിയിരുന്നു
ഈ വർഷം വൻ വിജയമായ ‘ധുരന്ധർ’ ഫ്രാഞ്ചൈസിയിലൂടെ തന്റെ താരമൂല്യം വീണ്ടും ഉയർത്തിയിരിക്കുകയാണ് രൺവീർ. വരാനിരിക്കുന്ന ബിഗ് ബജറ്റ് ചിത്രം ‘കിങ്ങിലൂടെ വെള്ളിത്തിരയിൽ വീണ്ടും വിസ്മയം തീർക്കാൻ ഒരുങ്ങുകയാണ് ദീപിക.
