പാലക്കാട് : വേനല്ച്ചൂടില് സംസ്ഥാനത്ത് വൈദ്യുതി ഉപയോഗം റെക്കോഡിലെത്തിയെങ്കിലും വൈദ്യുതി പ്രതിസന്ധിയുണ്ടാകില്ലെന്ന് മന്ത്രി കെ കൃഷ്ണന്കുട്ടി.പവര്കട്ട് വരില്ലെന്നും അദ്ദേഹം പറഞ്ഞു. പുറത്തുനിന്ന് കൂടുതല് വൈദ്യുതി വാങ്ങേണ്ടി വരുമെങ്കിലും കറന്റ് ബില്ല് കൂടില്ല. അടിയന്തര അവലോകന യോഗം വ്യാഴാഴ്ച ചേരുമെന്നും മന്ത്രി പറഞ്ഞു.
സംസ്ഥാനത്ത് വൈദ്യുതി ഉപഭോഗം ഇന്നലെ ചരിത്രത്തിലാദ്യമായി 6000 മെഗാവാട്ട് പിന്നിട്ടു. ഈ മാസം 13ന് രേഖപ്പെടുത്തിയ 5933 മെഗാവാട്ടായിരുന്നു മുന് റെക്കോര്ഡ്. ഇന്നലത്തെ മൊത്തം വൈദ്യുതി ഉപയോഗം 112.52 ദശലക്ഷം യൂണിറ്റ്.
ആഭ്യന്തര ഉല്പാദനം കൂട്ടുമെന്ന് കെ എസ് ഇ ബി അറിയിച്ചു.ചൂട് കൂടിയതിനാല് വീടുകളിലും സ്ഥാപനങ്ങളിലും എ സി, കൂളര് തുടങ്ങിയ ഉപകരണങ്ങള് നിരന്തരം ഉപയോഗിക്കുന്നതാണ് വൈദ്യുതി ഉപഭോഗം വലിയ തോതില് കൂടാന് കാരണമെന്ന് അധികൃതര് പറയുന്നു.
നിലവിലെ പ്രതിസന്ധി പരിഹരിക്കാന് ആഭ്യന്തര ഉല്പാദനം വര്ധിപ്പിക്കുമെന്ന് കെഎസ്ഇബി അറിയിച്ചിട്ടുണ്ട്. എന്നാല്, പുറത്തുനിന്ന് വന്തോതില് വൈദ്യുതി വാങ്ങേണ്ടി വരുന്നത് ബോര്ഡിന് വലിയ സാമ്പത്തിക ബാധ്യത സൃഷ്ടിക്കും. അധികമായി വാങ്ങുന്ന ഈ വൈദ്യുതിയുടെ ചെലവ് വരും മാസങ്ങളിലെ ഇന്ധന സര്ചാര്ജില് പ്രതിഫലിക്കാന് സാധ്യതയുണ്ടെന്നാണ് സൂചന.
വൈകുന്നേരം ആറ് മണി മുതല് രാത്രി 11 മണി വരെയുള്ള പീക്ക് സമയങ്ങളില് വൈദ്യുതി ഉപയോഗം പരമാവധി നിയന്ത്രിക്കണമെന്ന് അധികൃതര് പറഞ്ഞു. ഈ സമയത്ത് അനാവശ്യമായ ലൈറ്റുകള് അണയ്ക്കാനും മോട്ടോര്, വാഷിംഗ് മെഷീന് തുടങ്ങിയ വലിയ തോതില് വൈദ്യുതി ഉപയോഗിക്കുന്ന ഉപകരണങ്ങള് പ്രവര്ത്തിപ്പിക്കാതിരിക്കാനും ശ്രദ്ധിക്കണം.
