ന്യൂദല്ഹി: ശബരിമല യുവതി പ്രവേശനവുമായി ബന്ധപ്പെട്ട പുനഃപരിശോധനാ ഹര്ജികള് പരിഗണിക്കുന്ന സുപ്രീംകോടതി ഒമ്പതംഗ ബെഞ്ചിന് മുന്നില് നായര് സര്വീസ് സൊസൈറ്റിയുടെ വാദത്തെ ശക്തമായി എതിര്ത്ത് തിരുവിതാംകൂര് ദേവസ്വം ബോര്ഡ്.ഓരോ വിഭാഗത്തിന്റെയും ആചാരങ്ങള് അതത് വിഭാഗത്തിന് തീരുമാനിക്കാമെന്ന എന് എസ് എസ് വാദത്തെയാണ് ബോര്ഡ് എതിര്ത്തത്.
ജാതി, വര്ഗം, ലിംഗം എന്നിവ പ്രകാരം ക്ഷേത്രപ്രവേശനം തടയുന്നത് ഭരണഘടനാ വിരുദ്ധമാണ്. ഭരണഘടനയുടെ 25(2)(ബി) അനുച്ഛേദം അനുസരിച്ച് പൊതുസ്വഭാവമുള്ള ഹൈന്ദവ ആരാധനാലയങ്ങളില് എല്ലാ വിഭാഗം ഹിന്ദുക്കള്ക്കും പ്രവേശനം നല്കാന് സര്ക്കാരിന് അധികാരമുണ്ട്. ഇത് തടയാന് മതവിഭാഗങ്ങളുടെ സ്വയംഭരണ അവകാശം (അനുച്ഛേദം 26) ഉപയോഗിക്കാനാവില്ലെന്ന് ബോര്ഡിന് വേണ്ടി മുതിര്ന്ന അഭിഭാഷകന് മനു അഭിഷേക് സിംഗ്വി വാദമുയര്ത്തി.
ക്ഷേത്രത്തിനുള്ളില് പ്രവേശിച്ച ശേഷം നടത്തുന്ന ആചാരങ്ങളില് നിയന്ത്രണങ്ങള് ഏര്പ്പെടുത്താന് 26(ബി) പ്രകാരം അവകാശമുണ്ടെങ്കിലും പ്രവേശനം തന്നെ തടയാന് ഇത് കാരണമാകരുത് എന്ന് സിംഗ്വി വാദിച്ചു.എന്നാല് സാമൂഹിക പരിഷ്കരണത്തിന്റെ പേരില് ഒരു മതത്തിന്റെ അന്തഃസത്ത ഇല്ലാതാക്കാന് കഴിയില്ലെന്ന് ജസ്റ്റിസ് ബി.വി. നാഗരത്ന പറഞ്ഞു.
