ന്യൂദല്ഹി: വനിതാ സംവരണ ഭേദഗതി ബില് അവതരണം നീട്ടിവയ്ക്കണമെന്ന കോണ്ഗ്രസ് ആവശ്യം കേന്ദ്ര സര്ക്കാര് തള്ളി. വനിതാ സംവരണത്തില് നീട്ടിവയ്ക്കല് രാഷ്ട്രീയം പാടില്ലെന്ന് കേന്ദ്ര പാര്ലമെന്ററികാര്യ മന്ത്രി കിരണ് റിജിജു കോണ്ഗ്രസ് അധ്യക്ഷനും രാജ്യസഭാ പ്രതിപക്ഷ നേതാവുമായ മല്ലികാര്ജ്ജുന് ഖാര്ഗെയ്ക്ക് അയച്ച കത്തില് വ്യക്തമാക്കി.
വേണ്ടത്ര മുന്നൊരുക്കമില്ലാതെയാണ് ബില് അവതരണം, സര്വകക്ഷി യോഗം വിളിച്ചേ ബില് അവതരിപ്പിക്കാവൂ, തുടങ്ങിയവ മല്ലികാര്ജ്ജുന് ഖാര്ഗെ ആവശ്യപ്പെട്ടിരുന്നു. കൂടാതെ ഈ ആവശ്യങ്ങളുമായി പ്രധാനമന്ത്രിക്ക് ഖാര്ഗെ കത്തും അയച്ചിരുന്നു. ഈ കത്തിനും കോണ്ഗ്രസിന്റെ പ്രചരണങ്ങള്ക്കും കത്തിലൂടെ കിരണ് റിജിജു അക്കമിട്ട് മറുപടി നല്കി.
പതിറ്റാണ്ടുകളായ കാത്തിരിപ്പിന് അറുതിവരുത്താന് സമയമായെന്ന് കിരണ് റിജിജു കത്തില് ചൂണ്ടിക്കാട്ടി. 2029ല് വനിതാ സംവരണം ഉറപ്പാക്കാന് മണ്ഡല പുനര് നിര്ണയം അത്യാവശ്യമാണ്. നടപടിക്രമങ്ങളുടെ പേരില് സംവരണം വൈകിക്കുന്നത് സ്ത്രീകള്ക്ക് ലഭിക്കേണ്ട നീതിയുടെ നിഷേധമാണ്. ഇതില് രാഷ്ട്രീയമില്ലെന്നും രാജ്യത്തെ പുത്രിമാര്ക്കുള്ള ഉറപ്പാണെന്നും കേന്ദ്ര സര്ക്കാര് വിശദീകരിച്ചു.
വനിതാ സംവരണ ഭേദഗതി ബില്ലുമായി ബന്ധപ്പെട്ട് ചര്ച്ചകള് നടന്നില്ലെന്ന പ്രതിപക്ഷ വാദം കിരണ് റിജിജു പൂര്ണമായും തള്ളി. മാര്ച്ച് 16ന് അയച്ച കത്തിന്റ അടിസ്ഥാനത്തില് ഖാര്ഗെയുമായും രാജ്യസഭയിലെ കോണ്ഗ്രസ് ചീഫ് വിപ്പ് ജയറാം രമേഷുമായും താന് തന്നെ ചര്ച്ചകള് നടത്തി.
മാര്ച്ച് 19 മുതല് പ്രധാനപ്പെട്ട പ്രതിപക്ഷ പാര്ട്ടികളുമായും എന്ഡിഎ കക്ഷികളുമായും ഔദ്യോഗിക ചര്ച്ചകള് നടത്തി. ഇക്കാലത്ത് എസ്പി, ഡിഎംകെ, വൈഎസ്ആര്സിപി, എന്സിപി, ശിവസേന (യുബിടി), എഐഎംഐഎം, ബിജെഡി, ടിഎംസി എന്നിവയുമായി ചര്ച്ചകള് നടത്തിയിട്ടുണ്ട്. ഇതുകൂടാതെ മാര്ച്ച് 23 മുതല് ഏപ്രില് രണ്ട് വരെ എന്ഡിഎക്ക് പുറത്തുള്ള സിപിഎം, സിപിഐ, മുസ്ലിം ലീഗ്, കേരള കോണ്ഗ്രസ്, ആപ്, ആര്ജെഡി, ബിആര്എസ്, ജെഎംഎം തുടങ്ങിയ പ്രതിപക്ഷ കക്ഷി നേതാക്കളുമായി ഫോണില് സംസാരിക്കുകയും ബില് അവതരണത്തിന് പിന്തുണ തേടിയിട്ടുമുണ്ട്. സംവാദം ഇപ്പോഴും തുടരുകയാണെന്നും അദ്ദേഹം പറഞ്ഞു. ചര്ച്ചകള്ക്കപ്പുറം പ്രവൃത്തിയിലേക്കും തീരുമാനങ്ങളിലേക്കും നീങ്ങേണ്ട സമയമായെന്നും കത്തില് ചൂണ്ടിക്കാട്ടുന്നു.
വനിതാ സംവരണ ഭേദഗതി ബില്ലിന് അംഗീകാരം നല്കുന്നതിനായി 16 മുതല് 18 വരെയാണ് പാര്ലമെന്റ് ചേരുന്നത്. ഈ ദിവസങ്ങളില് മുഴുവന് അംഗങ്ങളും നിര്ബന്ധമായും ഹാജരാകണമെന്ന് കാണിച്ച് ഇരുസഭകളിലെയും എംപിമാര്ക്ക് ബിജെപിയും കോണ്ഗ്രസും വിപ്പ് നല്്കിയിട്ടുണ്ട്. 2023 സപ്തംബറില് പാര്ലമെന്റ് പാസാക്കിയ നാരീശക്തി വന്ദന് അധിനിയത്തില് ഭേദഗതി വരുത്തിയാണ് പുതിയ ബില് നടപ്പാക്കുന്നത്.
