തിരുവനന്തപുരം: കഴിഞ്ഞ ദിവസം നടന്ന വോട്ടെടുപ്പില്‍ റെക്കോഡിട്ട് സംസ്ഥാനത്തെ വനിതാ വോട്ടര്‍മാര്‍.കേരളത്തില്‍ വനിതാ വോട്ടര്‍മാരുടെ ഏറ്റവുമുയര്‍ന്ന പോളിംഗ് ശതമാനം രേഖപ്പെടുത്തിയത് ഇത്തവണയാണ്.
ആകെ വനിതാ വോട്ടര്‍മാരില്‍ 81.19 ശതമാനം പേര്‍ ഇത്തവണ വോട്ട് ചെയ്തു. 2021ലെക്കാള്‍ 7.25 ശതമാനം വര്‍ധന ഇത്തവണ രേഖപ്പെടുത്തി. പുരുഷ – വനിതാ വോട്ടര്‍മാരുടെ പോളിംഗ് ശതമാനം തമ്മില്‍ ആറ് ശതമാനം വ്യത്യാസമുണ്ട്.
സംസ്ഥാനത്ത് മൊത്തമായി 2,71,42,952 വോട്ടര്‍മാരാണ് ഉളളത്. അതില്‍ 1,39,21,868 പേര്‍ വനിതാ വോട്ടര്‍മാരായിരുന്നു.കണക്കുകള്‍ പ്രകാരം 1,13,03,016 വനിതകള്‍ ഇത്തവണ വോട്ട് ചെയ്തു.
2021ല്‍ 1,41,64,697 വനിതാ വോട്ടര്‍മാരാണ് ഉണ്ടായിരുന്നത്.അതില്‍ 1,04,73,083 പേര്‍ വോട്ട് ചെയ്തു.
2021ല്‍ 73.94 ശതമാനം വനിതകളാണ് വോട്ട് ചെയ്തത്. ഇതിന് മുമ്പ് വനിതാ വോട്ടര്‍മാരുടെ ഉയര്‍ന്ന പോളിംഗ് ശതമാനം 1987ലായിരുന്നു.അന്ന് 80.58 ശതമാനം വനിതകളാണ് വോട്ട് ചെയ്തത്.
