സുല്ത്താന് ബത്തേരി: വടക്കനാട്, വള്ളുവാടി മേഖലകളില് ആഴ്ചകളോളം ഭീതിയുടെ അന്തരീക്ഷം സൃഷ്ടിച്ച മുട്ടിക്കൊമ്പന് ചികിത്സ തുടങ്ങി. മയക്കുവെടിവച്ച് പിടിച്ച് മുത്തങ്ങയിലെ പന്തിയിലാക്കിയ ആനയുടെ തുമ്പിക്കൈയ്ക്ക് പരിക്കുണ്ട്.
13 ദിവസം നീണ്ട ദൗത്യത്തില് വെള്ളിയാഴ്ച പുലര്ച്ചെ താത്തൂര് സെക്ഷനിലെ ഓനച്ചന് കവലയിലാണ് ആനയെ വിജയകരമായി മയക്കുവെടി വച്ചത്.മാര്ച്ച് നാലിന് വടക്കനാടില് കര്ഷകനായ രജീവ്(37) ആനയുടെ ആക്രമണത്തില് കൊല്ലപ്പെട്ടിരുന്നു.ഇതേത്തുടര്ന്ന് ചീഫ് വൈല്ഡ് ലൈഫ് വാര്ഡന് ഉത്തരവിട്ട പ്രകാരമാണ് പ്രത്യേക ദൗത്യസംഘം രൂപീകരിച്ച് ആനയെ പിടിച്ചത്. രാത്രികാലങ്ങളില് വൈദ്യുതവേലി തകര്ത്ത് കൃഷിയിടങ്ങളിലിറങ്ങി നാശം വിതയ്ക്കുന്ന ആനയാണ് മുട്ടിക്കൊമ്പന്.
വെടിയേറ്റ് മയങ്ങിയ ആനയെ മുത്തങ്ങ പന്തിയിലെ കുങ്കിയാനകളുടെ സഹായത്തോടെയാണ് വനത്തിന് പുറത്ത് എത്തിച്ചത്. പിന്നീട് റേഡിയോ കോളര് ഘടിപ്പിച്ചു. തുമ്പിക്കൈയില് പരിക്ക് ഉള്ളതിനാല് കാട്ടില് സ്വയം തീറ്റ തേടാന് പ്രയാസപ്പെടുമെന്ന് കണ്ടാണ് പന്തിയിലെത്തിച്ച് ചികിത്സിക്കാന് തീരുമാനിച്ചത്. പരിക്ക് ഭേദമാകുന്നതുവരെ ആനയെ മുത്തങ്ങ ക്യാമ്പില് പരിചരിക്കും. ശേഷം ഉള്ക്കാട്ടില് വിടാനാണ് പദ്ധതി.
