തിരുവനന്തപുരം: ഒമ്പതാം ക്ലാസിലെ പ്രവര്ത്തിപരിചയ പരീക്ഷയുടെ ചോദ്യപേപ്പര് എത്തിക്കാത്തതിനെ തുടര്ന്ന് പരീക്ഷ എഴുതാനാകാതെ വിദ്യാര്ത്ഥികള്. രണ്ട് പേജുള്ള ചോദ്യപേപ്പറില് പരീക്ഷ എഴുതാനായത് ഒരു പേജിലെ ചോദ്യങ്ങള്ക്ക് മാത്രം. പാറശ്ശാല സബ് ജില്ലയിലെ സ്കൂളുകളില് നടന്ന പരീക്ഷയ്ക്കാണ് ചോദ്യപേപ്പര് എത്തിക്കാത്തത്. കൊല്ലത്തും കോഴിക്കോടും സമാന സംഭവം ഉണ്ടായപ്പോള് വാട്സ്ആപ്പ് വഴി ചോദ്യപേപ്പറിന്റെ കോപ്പികള് ഫോട്ടോ എടുത്ത് അയച്ചു നല്കി. ഓരോ ചോദ്യവും അദ്ധ്യാപകര് വായിച്ച് നല്കി വിദ്യാര്ത്ഥികള് ഉത്തരം എഴുതി. എന്നാല് പാറശ്ശാലയില് അതുണ്ടായില്ല.
ചോദ്യപേപ്പര് ഇല്ലെന്നറിഞ്ഞ് വിദ്യാഭ്യാസ വകുപ്പുമായി ബന്ധപ്പെട്ടപ്പോള് മെയില് ചെയ്ത് കൊടുത്തു. എന്നാല് രണ്ട് പേജുള്ള ചോദ്യപേപ്പറില് ഒരു പേജ് മാത്രമാണ് അയച്ചുനല്കിയത്. ഇതില് ആറ് ചോദ്യങ്ങള് മാത്രമാണ് ഉണ്ടായിരുന്നത്. ഈ ചോദ്യങ്ങള് ഫോട്ടോസ്റ്റാറ്റ് എടുത്ത് സ്കൂള് അധികൃതര് വിദ്യാര്ത്ഥികള്ക്ക് നല്കി. ഇംഗ്ലീഷ് മീഡിയംകാര്ക്ക് നല്കിയത് മലയാളത്തിലെ ചോദ്യപേപ്പര്. ഇവര്ക്ക് അദ്ധ്യാപകര് ഇംഗ്ലീഷിലാക്കി ചോദ്യങ്ങള് വായിച്ച് നല്കുകയായിരുന്നു. രണ്ടാം പേജിലെ ചോദ്യപേപ്പര് എത്തിയില്ലെന്ന് അറിയിച്ചിട്ടും ബന്ധപ്പെട്ടവര് നടപടി സ്വീകരിച്ചതുമില്ല. ഒടുവില് ഒരു പേജിലെ ചോദ്യങ്ങള്ക്ക് മാത്രം ഉത്തരം എഴുതി നല്കി വിദ്യാര്ത്ഥികള് മടങ്ങി.
ചോദ്യപേപ്പര് അച്ചടിക്കുന്ന പ്രസ്സില് നിന്നാണ് വിദ്യാര്ത്ഥികളുടെ എണ്ണം കണക്കാക്കി കെട്ടുകളാക്കി ജില്ലാ വിദ്യാഭ്യാസ ഓഫീസര്ക്ക് നല്കുന്നത്. കെട്ടുകള് കൃത്യമായി പരിശോധിച്ച് വേണം വിദ്യാലയങ്ങളില് എത്തിക്കാന്. എന്നാല് യാതൊരു വിധ പരിശോധനയും നടത്താതെയാണ് ചോദ്യ പേപ്പറുകള് എത്തിച്ചത്. സംസ്ഥാനത്തെങ്ങും ഇത്തരത്തില് പ്രശ്നം ഉണ്ടായതിന് പിന്നില് വിദ്യാഭ്യാസ വകുപ്പിലെ അനാസ്ഥയെന്ന് ചൂണ്ടിക്കാട്ടുന്നു.
