കാലടി: ശ്രീശങ്കരാചാര്യ സംസ്കൃത സര്വകലാശാലയില് ബിഎഫ്എ പരീക്ഷ തോറ്റ വിദ്യാര്ത്ഥിക്ക് എംഎഫ്എക്ക് പ്രവേശനം നല്കുകയും ബിഎഫ്എ ജയിപ്പിക്കുകയും ചെയ്തത് സംബന്ധിച്ച രേഖകള് ഇന്ന് ഗവര്ണര് രാജേന്ദ്ര വിശ്വനാഥ് ആര്ലേക്കര്ക്ക് കൈമാറും. ലോക്ഭവന്റെ നിര്ദ്ദേശ പ്രകാരം വിസിയും സര്വകലാശാല ഉദ്യോഗസ്ഥരും ഇന്ന് ഗവര്ണറുമായി കൂടിക്കാഴ്ച നടത്തും.
പരാതിയുടെ നിജസ്ഥിതി ബോധ്യപ്പെടുത്താന് ഗവര്ണര് വിസിയോട് ആവശ്യപ്പെട്ടിട്ടുണ്ട്. ബിഎഫ്എ തോറ്റ എസ്എഫ്ഐ വിദ്യാര്ത്ഥിക്ക് എംഎഫ്എയ്ക്ക് പ്രവേശനം നല്കുകയും തുടര്ന്ന് സിന്ഡിക്കേറ്റ് യോഗം ചേര്ന്ന് പ്രസ്തുത വിദ്യാര്ത്ഥിയെ ബിഎഫ്എ ജയിച്ചതായി പ്രഖ്യാപിക്കുകയും ചെയ്തത് വിവാദമായിരുന്നു. പരീക്ഷാ വിഭാഗം വീഴ്ച ചൂണ്ടിക്കാട്ടിയിരുന്നുവെങ്കിലും സിന്ഡിക്കേറ്റ് അവരുടെ നിലപാട് അംഗീകരിക്കാന് കൂട്ടാക്കിയില്ല. തീരുമാനം തടഞ്ഞുവെക്കാന് ഗവര്ണര് വിസിക്ക് നിര്ദ്ദേശം നല്കിയിരുന്നുവെങ്കിലും സിന്ഡിക്കേറ്റ് തീരുമാനം തടയാന് അന്നത്തെ വിസി തയ്യാറായില്ല.
തുടര്ന്ന് വിസിയുടെ ചുമതല വഹിച്ചിരുന്ന കാലിക്കറ്റ് യൂണിവേഴ്സിറ്റി സംസ്കൃത പ്രൊഫ. ഡോ. കെ.കെ. ഗീതാകുമാരിയെ വിസി സ്ഥാനത്ത് നിന്ന് മാറ്റുകയായിരുന്നു. സാങ്കേതിക സര്വകലാശാല വിസി ഡോ. സിസാ തോമസിന് വിസിയുടെ ചുമതല നല്കി. വിസിയും രജിസ്ട്രാറും പരീക്ഷാ വിഭാഗത്തിന്റെ സെക്ഷന് ഓഫീസറും ഇന്ന് ഗവര്ണറെ നേരില്ക്കണ്ട് നിജസ്ഥിതി ബോധ്യപ്പെടുത്തും. നേരത്തെയും ബിഎ തോറ്റ വിദ്യാര്ത്ഥികള്ക്ക് എംഎയ്ക്ക് പ്രവേശനം നല്കിയതായ ആക്ഷേപമുണ്ടായതിനെ തുടര്ന്ന് അവരുടെ പ്രവേശനം റദ്ദാക്കിയിരുന്നു. സേവ് യൂണിവേഴ്സിറ്റി ക്യാമ്പയിന് കമ്മിറ്റി സര്വ്വകലാശാലയില് നടന്ന ക്രമക്കേട് എതിരെ ആര്ലേക്കര്ക്ക് പരാതി നല്കിയിരുന്നു.
