കൊടുങ്ങല്ലൂര്: തീപ്പെട്ട കൊടുങ്ങല്ലൂര് വലിയ തമ്പുരാന് കുഞ്ഞുണ്ണി രാജക്ക് ഗാര്ഡ് ഓഫ് ഓണര് കൊടുക്കുവാന് ഇടത് സര്ക്കാര് തയ്യാറാകാത്തതില് ഹിന്ദു ഐക്യവേദിയും ക്ഷേത്ര സംരക്ഷണ സമിതിയും പ്രതിഷേധിച്ചു. എല്ലാ ഹൈന്ദവ ആചാരാനുഷ്ഠാനങ്ങളോടും, അത് പാലിക്കാന് ശ്രമിക്കുന്നവരോടും ഉള്ള ഇടതുപക്ഷ സര്ക്കാരിന്റെ നിലപാട് കൂടിയാണ് ഇതില് നിന്നും വ്യക്തമാകുന്നത്.
ലക്ഷക്കണക്കിന് ഭക്തര് വന്നുചേരുന്ന കൊടുങ്ങല്ലൂര് ഭരണി മഹോത്സവത്തിന് നേതൃത്വം കൊടുത്തുകൊണ്ട് അശ്വതി കാവ് തീണ്ടലിന്റെ സമാപനചടങ്ങുകളിലേക്ക് കടന്നുകൊണ്ടിരിക്കുന്ന സമയത്താണ് തമ്പുരാന്റെ വിയോഗം ഉണ്ടായത്. സര്ക്കാര് നടപടിയില് ഹിന്ദു ഐക്യവേദി താലൂക്ക് കമ്മിറ്റി യോഗം ശക്തമായി പ്രതിഷേധിച്ചു. സര്ക്കാര് ഈ നിലപാട് തിരുത്തി തമ്പുരാന്െ കുടുംബാംഗങ്ങളോടും, ഹൈന്ദവ സമൂഹത്തോടും മാപ്പുപറയണമെന്ന് യോഗം ആവശ്യപ്പെട്ടു. യോഗത്തില് ഹിന്ദു ഐക്യവേദി താലൂക്ക് പ്രസിഡന്റ് ജ്യോതി ബാസ് തേവര്ക്കാടില്, നികേഷ് കീഴ്പുള്ളിക്കര, ദാസ് മുളങ്ങില്, രാജേഷ് പെരിഞ്ഞനം, ജയറാം തറയില്, എന്നിവര് സംസാരിച്ചു.
സംഭവത്തില് കേരള ക്ഷേത്ര സംരംക്ഷണ സമിതിയും പ്രതിഷേധിച്ചു. ഇതിന് മുമ്പ് തെരഞ്ഞെടുപ്പ് പ്രോട്ടോകോള് നിലനില്ക്കുമ്പോള് പലര്ക്കും ഗാര്ഡ് ഓഫ് ഓണര് നല്കിയിട്ടുള്ളതാണ്. ഈ നടപടി ഹിന്ദു സമൂഹത്തോടും കൊടുങ്ങല്ലൂര് ക്ഷേത്രത്തോടും കാണിച്ച അവഗണനയാണ്. തമ്പുരാനെ അവഹേളിച്ച നടപടി പ്രതിഷേധാര്ഹമാണ്. സ്ഥലം എംഎല്എയാണ് കളക്ടറുമായി ബന്ധപെട്ട് ഈ കാര്യത്തില് നിലപാട് സ്വീകരിക്കേണ്ടിയിരുന്നത്. എന്നാല് അദ്ദേഹം വേണ്ടത്ര താല്പര്യം എടുത്തില്ലെന്ന് സമിതി ആരോപിച്ചു.
ഇത് സംബന്ധിച്ച് ചേര്ന്ന കേരള ക്ഷേത്ര സംരക്ഷണ സമിതിയുടെ അടിയന്തിര യോഗത്തില് താലൂക്ക് പ്രസിഡണ്ട് കെ.എം.മോഹന് ദാസ് അധ്യക്ഷത വഹിച്ചു. സംസ്ഥാന എക്സിക്യൂട്ടീവ് കമ്മിറ്റിയംഗം സി.എം.ശശീന്ദ്രന്, ജില്ല ട്രഷറര് വെങ്കിടേശ്വര പ്രഭു, ജില്ല മാതൃസമിതി അധ്യക്ഷ ഡോ. ആശാലത, ജില്ല ജോ: സെക്രട്ടറി ദിലീപ് കുമാര്, താലൂക്ക് സെക്രട്ടറി സി.പരമേശ്വരന്എന്നിവര് സംസാരിച്ചു.
