ന്യൂദല്ഹി: ധുരന്ധര് 2 ആദ്യദിവസം തന്നെ 100 കോടി നേടി ബോക്സോഫീസില് തകര്ത്ത് മുന്നേറുമ്പോള് അനുഗ്രഹം തേടി താരങ്ങളും അണിയറപ്രവര്ത്തകരും അയോധ്യ ക്ഷേത്രത്തില് എത്തി. കൂടുതല് വിജയത്തിനായുള്ള അനുഗ്രഹം തേടുന്നതോടൊപ്പം സനാതനധര്മ്മത്തിലുള്ള വിശ്വാസം പങ്കുവെയ്ക്കാനും കൂടിയാണ് സംവിധായകന് ആദിത്യ ധറും ഭാര്യ യാമി ഗൗതമും അയോധ്യാരാമക്ഷേത്രത്തില്എത്തിയത്.
സംവിധായകന് ആദിത്യ ധര്, ഭാര്യ യാമി ഗൗതം, നടന്മാരായ രണ്വീര് സിങ്ങ്, മാധവന്, സഞ്ജയ് ദത്ത് എന്നിവരെല്ലാം ദര്ശനത്തിനെത്തിയിരുന്നു. നിരവധി ഫോട്ടോകള് അവര് എടുത്തു. പിന്നീട് ദീര്ഘനേരം ക്ഷേത്രത്തിനകത്ത് പോയി പ്രാര്ത്ഥിച്ചു.
സാധാരണവിജയമായിരുന്നില്ല ധുരന്ധര് ഒന്നാം ഭാഗവും ധുരന്ധര് രണ്ടാം ഭാഗവും നേടിയത്. കോണ്ഗ്രസ് ഭരണകാലത്ത് എങ്ങിനെയാണ് ഇന്ത്യന് രാഷ്ട്രീയക്കാര് പാകിസ്ഥാന് വേണ്ടി രാജ്യത്തെ പണയപ്പെടുത്തിയിരുന്നത് എന്ന് വ്യക്തമായി സംഭവകഥകളുടെ അടിസ്ഥാനത്തില് തുറന്നുകാണിക്കുകയാണ് ഈ സിനിമ. പാകിസ്ഥാനിലെ കള്ളനോട്ടടി സംഘവും അധോലോകസംഘവും കോണ്ഗ്രസ് രാഷ്ട്രീയനേതാക്കളുടെ തണലില് എത്രത്തോളം ഇന്ത്യയെ അമ്മാനമാടിയിരുന്നു എന്ന കാണുന്നത് പ്രേക്ഷകര്ക്ക് വലിയ ഷോക്കായിരുന്നു. രണ്ടാം ഭാഗത്തില് മോദിയുടെ കഥയും കൂടി എത്തുന്നതോടെ കൂടുതല് ജനപ്രീതി നേടിയിരിക്കുകയാണ്. നോട്ട് നിരോധനത്തിന് പിന്നില് കള്ളപ്പണം പിടിക്കല് മാത്രമല്ല, മറ്റ് കുറെ ലക്ഷ്യങ്ങള് മോദിയ്ക്കുണ്ടായിരുന്നു എന്ന കാര്യം സിനിമയില് വിശദമായി കാണിക്കുന്നു. സിനിമ നാല് മണിക്കൂര് ദൈര്ഘ്യം ഉണ്ടായിരുന്നിട്ടും ബോറടിക്കാതെ കണ്ടു എന്നാണ് എഴുത്തുകാരി ശോഭാ ദേ പറഞ്ഞത്. പക്ഷെ ചരിത്രസത്യങ്ങളില് കോര്ത്തെടുത്ത സിനിമയായിരുന്നിട്ടും ഇതിനെതിരെ കോണ്ഗ്രസ് അനുഭാവികളും കോണ്ഗ്രസ് അനുകൂല ബുദ്ധിജീവികളും വിമര്ശനങ്ങളുമായി രംഗത്ത് വന്നിരിക്കുകയാണ്.
