കണ്ണൂര്: മുഖ്യമന്ത്രി പിണറായി വിജയനും ഭാര്യ കമലയ്ക്കും കൂടി ആകെ ഒരു കോടിയിലേറെ രൂപയുടെ നിക്ഷേപം.ധര്മ്മടം നിയമസഭാ മണ്ഡലത്തില് ഇന്ന് സമര്പ്പിച്ച നാമനിര്ദേശ പത്രികയോടൊപ്പം നല്കിയ സത്യവാംഗ്മൂലത്തിലാണ് സ്വത്ത് വിവരങ്ങള് നല്കിയത്.
പിണറായി വിജയന് 43.35 ലക്ഷത്തിന്റെ നിക്ഷേപവും ഭാര്യക്ക് 60.58 ലക്ഷത്തിന്റെ നിക്ഷേപവുണ്ട്. പിണറായിക്ക് 78 സെന്റ് സ്ഥലം സ്വന്തമായുളളപ്പോള് കമലയ്ക്ക് ഒഞ്ചിയത്ത് 17.5 സെന്റ് സ്ഥലവുമുണ്ട്.
കമലയ്ക്ക് പത്ത് പവന് സ്വര്ണാഭരണമുണ്ട്. ഇരുവരുടെയും പേരില് ബാധ്യതകള് ഒന്നുമില്ല. പിണറായിയുടെ പേരില് മൂന്ന് ക്രിമിനല് കേസുകള് നിലവിലുണ്ടെങ്കിലും ഒരു കേസിലും ശിക്ഷിക്കപ്പെട്ടിട്ടില്ല.
മൂന്നാം തവണ ധര്മ്മടം മണ്ഡലത്തില് നിന്ന് എല്ഡിഎഫ് സ്ഥാനാര്ത്ഥിയായി മത്സരിക്കുന്ന പിണറായി വിജയന് ഇന്ന് രാവിലെ 11 മണിയോടെയാണ് നാമനിര്ദ്ദേശ പത്രിക സമര്പ്പിച്ചത്.തലശേരി സബ് രജിസ്ട്രാര് ഓഫീസിലെത്തി റിട്ടേണിംഗ് ഓഫിസര് സച്ചിന് കൃഷ്ണയ്ക്ക് മുമ്പാകെയാണ് പത്രിക സമര്പ്പിച്ചത്. സിപിഎം നേതാക്കളായ ഇ പി ജയരാജന്, എ എന് ഷംസീര്, കെ കെ രാഗേഷ് തുടങ്ങിയവരും എല്ഡിഎഫ് നേതാക്കളും പിണറായിക്കൊപ്പമുണ്ടായിരുന്നു.
