തിരുവനന്തപുരം: രണ്ടാം ബലാത്സംഗക്കേസില് രാഹുല് മാങ്കൂട്ടത്തില് എംഎല്എയുടെ മുന്കൂര് ജാമ്യം റദ്ദാക്കണമെന്ന ആവശ്യം തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി തളളി. അന്വേഷണ സംഘമാണ് ഈ ആവശ്യവുമായി കോടതിയെ സമീപിച്ചത്.
രാഹുലിന്റെ ഫോണുകളില് നിന്ന് അതിജീവിതകളുടെ നമ്പര് നീക്കം ചെയ്ത് കോടതിയെ അറിയിക്കണമെന്നും നിര്ദ്ദേശമുണ്ട്.കര്ശന ഉപാധികളോടെയാണ് കോടതി രാഹുലിന് ജാമ്യം അനുവദിച്ചിരുന്നത്. പരാതിക്കാരിയെ നേരിട്ടോ അല്ലാതെയോ ബന്ധപ്പെടാന് ശ്രമിക്കരുത്, അന്വേഷണവുമായി പൂര്ണമായി സഹകരിക്കണം എന്നിവയായിരുന്നു പ്രധാന ജാമ്യ വ്യവസ്ഥകള്.
എന്നാല് രാഹുല് മാങ്കൂട്ടത്തില് തന്നെ വാട്സ്ആപ്പ് കോളിലൂടെ ബന്ധപ്പെടാന് ശ്രമിച്ചുവെന്ന് യുവതി പരാതി നല്കി.ഇതാണ് ജാമ്യം റദ്ദാക്കണമെന്ന ആവശ്യവുമായി പ്രോസിക്യൂഷന് കോടതിയെ സമീപിക്കാന് കാരണം.
അതിജീവിതയുടെ പരാതി അടക്കം കോടതിയില് സമര്പ്പിച്ചായിരുന്നു രാഹുലിന്റെ മുന്കൂര് ജാമ്യം റദ്ദാക്കണമെന്ന ആവശ്യം ഉന്നയിച്ചത്. രാഹുല് വിളിച്ചപ്പോള് ഫോണ് എടുത്തിരുന്നില്ലെന്നും പ്രത്യേക അന്വേഷണ സംഘത്തിന് നല്കിയ പരാതിയില് അതിജീവിത പറയുന്നു.
