തിരുവനന്തപുരം: സര്ക്കാര് മെഡിക്കല് കോളേജ് ഡോക്ടര്മാര് മാര്ച്ച് 12 മുതല് പുനരാരംഭിക്കുമെന്ന് പ്രഖ്യാപിച്ചിരുന്ന അനിശ്ചിതകാല ഒപി ബഹിഷ്കരണവും ശസ്ത്രക്രിയ ബഹിഷ്കരണവും ഉള്പ്പെടെയുള്ള സമരപരിപാടികള് താല്ക്കാലികമായി നീട്ടിവയ്ക്കാന് തീരുമാനം. കേരള ഗവണ്മെന്റ് മെഡിക്കല് കോളജ് ടീച്ചേഴ്സ് അസോസിയേഷന് (KGMCTA) സംസ്ഥാന സമിതിയുടേതാണ് തീരുമാനം.
ഡോക്ടര്മാര് സര്ക്കാരുമായി നടത്തിയ ചര്ച്ചകള് ശുഭ പ്രതീക്ഷകള് നല്കുന്ന സാഹചര്യത്തിലാണ് സമരം നീട്ടിവച്ചത്.അനുകൂലമായ സര്ക്കാര് ഉത്തരവ് ഉണ്ടായില്ലെങ്കില് സമരം പുനരാരംഭിക്കുന്ന പുതിയ തീയതി പിന്നീട് പ്രഖ്യാപിക്കും.
2016 മുതലുള്ള ശമ്പള കുടിശിക നല്കി,രോഗീ ബാഹുല്യത്തിന് അനുസരിച്ച് ഡോക്ടര്മാരുടെ തസ്തികകള് സൃഷ്ടിച്ച്, ആവശ്യത്തിന് ചികിത്സാ സൗകര്യങ്ങള് ഒരുക്കി മെഡിക്കല് കോളേജ് ഡോക്ടര്മാരുടെ ആവശ്യങ്ങളില് അനുകൂലമായ ഉത്തരവ് ഉടന് ഉണ്ടാകുമെന്നാണ് സംഘടന പ്രതീക്ഷിക്കുന്നത്. അല്ലാത്തപക്ഷം കൂടുതല് തീവ്രതയോടെ സമരം പുനരാരംഭിക്കുമെന്ന് ഭാരവാഹികള് അറിയിച്ചു.
