തിരുവനന്തപുരം: ട്വന്റി 20 ലോകകപ്പ് കിരീട നേട്ടവുമായി പ്രിയതാരം സഞ്ജു സാംസണ് തിരുവനന്തപുരത്തെത്തി. പ്രത്യേക വിമാനത്തില് എത്തിയ സഞ്ജുവിനെ മന്ത്രി വി ശിവന്കുട്ടി നേരിട്ടെത്തി സ്വീകരിച്ചു.
നാട്ടില് നടന്ന മത്സരത്തില് നന്നായി കളിക്കാന് പറ്റാത്ത വിഷമത്തിലാണ് ഇവിടെ നിന്ന് പോയതെന്നും ഇത്രയും വലിയൊരു ട്വിസ്റ്റ് ഉണ്ടാകുമെന്ന് കരുതിയില്ലെന്നും സഞ്ജു പറഞ്ഞു. തിരിച്ചടികളുണ്ടായപ്പോള് ആണല്ലോ നാട്ടുകാര് എപ്പോഴും കൂടെ നിന്നിട്ടുള്ളത്. ആ ഒരു സമയത്ത് നമ്മളെ പിന്തുണച്ച ആളുകള്ക്ക് തിരിച്ചൊരു സന്തോഷം കൊടുക്കണമെന്ന ഉത്തരവാദിത്തം എന്റെ മനസില് എപ്പോഴുമുണ്ടായിരുന്നു. ഈ ഒരു പ്രകടനം നാട്ടിലുള്ള എല്ലാവര്ക്കുമായി സമര്പ്പിക്കുന്നു. ഇത്രയും ആളുകളുടെ പിന്തുണയും പ്രാര്ഥനകളും എല്ലാം ഉള്ക്കൊള്ളുന്ന വീഡിയോകളും മെസേജുകളും റീലുകളുമെല്ലാം ഭാര്യ കാണിച്ചു തരുന്നുണ്ടായിരുന്നു. അത് കാണുമ്പോള് കണ്ണ് നിറഞ്ഞ് പോകുന്നുണ്ട്.ഈ സ്നേഹം അര്ഹിക്കുന്നുണ്ടോ എന്ന് അറിയില്ല. സ്നേഹിക്കുന്ന എല്ലാവര്ക്കും എനിക്കായി പ്രാര്ഥിച്ച എല്ലാവര്ക്കും നന്ദി അറിയിക്കുന്നതായി സഞ്ജു പറഞ്ഞു.
സച്ചിന് ടെണ്ടുല്ക്കറിന്റെ ഉപദേശം കിട്ടിയതിനെ കുറിച്ചും സഞ്ജു പ്രതികരിച്ചു.ഐപിഎല്ലില് കാണുമ്പോഴൊക്കെ സംസാരിക്കാറുണ്ടായിരുന്നു.മനസൊന്ന് പാളിപ്പോയപ്പോള്, വിളിച്ചത് സാറിനെയാണ്. 25 മിനിറ്റ് ഫോണില് സംസാരിച്ചു.സാറിന്റെ കരിയറില് നടന്ന ചില കാര്യങ്ങള് എന്നോട് പങ്കിട്ടു. ഈ സമയത്ത് എന്തൊക്കെ ചിന്തിക്കണം, എങ്ങനെ പ്രാക്ടീസ് ചെയ്യണം, സാഹചര്യത്തെ എങ്ങനെ കാണണം എന്നൊക്കെ പറഞ്ഞു തന്നു. അത് ഏറെ സഹായകമായി. ന്യൂസിലന്ഡ് സീരിസിലും ഫോം ഔട്ടായപ്പോള് വിളിച്ച് ഉപദേശങ്ങള് നല്കി. ലോക കപ്പ് ഫൈനലിന്റെ തലേദിവസം ഇങ്ങോട്ട് വിളിച്ച് എല്ലാം ഓക്കെ അല്ലേ എന്ന് ചോദിച്ചു. എല്ലാവര്ക്കും കിട്ടുന്നൊരു ഭാഗ്യമല്ല. എനിക്ക് കിട്ടിയതില് സന്തോഷം. കളി കഴിഞ്ഞതിന് ശേഷവും അഭിനന്ദിച്ച് മെസേജ് അയച്ചിരുന്നു – സഞ്ജു പറഞ്ഞു
തുടര്ച്ചയായി പരാജയങ്ങള് നേരിട്ടപ്പോഴാണ് എല്ലാ ബോളും അടിച്ചുകളിക്കുന്ന ശൈലി ഒഴിവാക്കിയത്. വീഴ്ചകളില് നിന്ന് പഠിക്കണമല്ലോ. അതുകൊണ്ട് വേറെ ഗെയിം പ്ലാനോടെ വേള്ഡ് കപ്പിന് പ്രിപ്പയര് ചെയ്തു.
സാമൂഹ്യ മാധ്യമങ്ങള് വളരെ പിന്തുണയ്ക്കുന്ന ഘടകമായി തോന്നിയിട്ടുണ്ട്. പോസിറ്റീവായും നെഗറ്റീവായും ചെയ്യാം. നമ്മള് ഏത് രീതിയിലാണ് അതിനെ കൈകാര്യം ചെയ്യുന്നതെന്ന് ഇപ്പോഴത്തെ ചെറുപ്പക്കാരും പഠിച്ചിരിക്കേണ്ടതാണ്. സാമൂഹ്യ മാധ്യമങ്ങള് കാണുന്നത് കൊണ്ടാണ് നാട്ടുകാര് എന്നെ എത്ര സ്നേഹിക്കുന്നുണ്ടെന്ന് മനസിലായത്. അതേപോലെ അതിന്റെ ഓപ്പോസിറ്റ് ഉണ്ടാകുമ്പോള് സഹിക്കാനുള്ള മനസുണ്ടെങ്കില് മാത്രം സാമൂഹ്യ മാധ്യമങ്ങള് ഓപ്പണാക്കി വയ്ക്കുക. കഴിഞ്ഞ ഒരു മാസമായിട്ട് ഫോണ് ഓഫാണ്. സാമൂഹ്യ മാധ്യമങ്ങള് എന്റെ ടീമാണ് മാനേജ് ചെയ്യുന്നത്.
രണ്ട് ദിവസം അച്ഛനുമമ്മയ്ക്കുമൊപ്പം ചെലവഴിക്കണമെന്നാണ് ആഗ്രഹം. ദല്ഹിയില് വിജയാഘോഷമുണ്ടെങ്കില് പങ്കെടുക്കാന് പോകും- സഞ്ജു പറഞ്ഞ് നിര്ത്തി.
